مرکزی دفتر سے باہر صحت افزا مقام میں اس طرح کی نشست ایک انوکھا تجربہ :  خالد حسین

جموں اینڈ کشمیر فکشن رائٹر گلڈ کی 229ویں نشست سنیچر ۲۳جولائی کو شمالی کشمیر کے صحت افزا مقام منگلو پارک وٹلب میں منعقد ہوئی۔ نشست کی صدارت اردو اور پنجابی کے معروف فکشن نگار خالد حسین نے کی۔ یہ دوسرا موقع  ہے جب گلڈ نے سرینگر سے باہر اپنی نشست منعقد کی۔ آوٹنگ کم ریڈنگ سیشن کے عنون سے یہ نشست اس لئے بھی منفرد رہی کہ پہلی بار سبھی ممبران کو کسی بھی صنف میں اپنی تخلیق پیش کرنے کا موقع فراہم کیا گیا۔  نشست کی شروعات ابتدائیہ سے ہوئی جو معروف ادیب مقبول فیروزی نے  عشق و محبت  کے تعلق سے اپنے منفرد صوفیانہ انداز میں پیش کیا۔

گلڈ کے جنرل سیکرٹری اور معروف ادیب، انجینئر شفیع احمد نے انشائیہ پیش کیا ۔ ساہتیہ اکادمی ایوارڈ یافتہ ادیب محی الدین رشی اور نوجوان قلمکار زاہد ظفر نے افسانے پیش کئے جب کہ معروف ادیب و معالج ڈاکٹر نذیر مشتاق نے اپنے چند افسانچے پیش کئے۔ اس موقعے پر شاعرانہ کلام بھی پیش کئے گئے۔ معروف ادیبہ ڈاکٹر نیلوفر ناز نحوی اور نوجوان ادیبہ شائستہ مبارک بخاری نے اپنی ایک غزل اور نظم سامعین کی سماعتوں کی نذر کی۔   اپنے صدارتی کلمات میں خالد حسین نے گلڈ کو مرکزی دفتر سے باہر آوٹنگ کم ریڈنگ سیشن کی صورت میں اس طرح کی نشست منعقد کرنے کو منفرد تجربے سے تعبیر کیا۔

انہوں نے کہا کہ قلمکار حساس طبیعت کے مالک ہوتے ہیں اور صحت افزا مقام پر اس طرح کی نشست فائدہ مند ثابت ہو گی۔ انہوں نے اپنا اردو افسانہ بھی سامعین کی نذر کیا۔ نشست میں پیش کی گئی سبھی تخلیقات کا حاضرین نے غور سے سنا اور ان پر سیر حاصل بحث بھی کی گئی۔ اس نشست کی ایک اور خاص بات یہ بھی رہی کہ محکمہ جنگلات کے اہلکاروں اور سیر پر آئے کئی سیاحوں نے اس میں شرکت کی۔ نظامت کے فرائض  گلڈ کے کارڈی نیٹر مشتاق برق نے انجام دیئے۔