Urdu News

ایک ترقی یافتہ ملک کے لیے رشوت سے پاک ہونا ضروری ہے:پروفیسر عبد الحلیم

ایک ترقی یافتہ ملک کے لیے رشوت سے پاک ہونا ضروری ہے:پروفیسر عبد الحلیم

شاہ خالد مصباحی

جامعہ ملیہ اسلامیہ کے شعبہ فارسی کے طلبا کی بزم ، بزم دانشجویان فارسی نے دو روزہ ویجیلنس آگاہی (vigilance awareness) پروگرام کا انعقاد کیا۔ اس موقع پر مختلف مقابلہ جاتی پروگراموں ، جیسے کوئز کمپیٹیشن ، مضمون نویسی ، نعت خوانی ، قرأت ، غزل سرائی ، ڈیبیٹ مقابلہ کا انعقاد کیا گیا۔

اس پروگرام کا آغاز بروز جمعرات مقابلہ قرأت سے ہوا جس میں طلبا کی ایک بڑی تعداد نے شرکت کی۔ بعدہ غزل سرائی، نعت خوانی مقابلے کی شروعات ہوئی جس میں طلبا نے چوکسی ، بدعنوانی ، رشوت بازی کے موضوعات سمیت مختلف موضوعات پر اشعار پڑھ کر اپنے تخلیقی نقطہ نظر کا مظاہرہ فرمایا ۔

مقابلہ جاتی پروگرام میں طلباو طالبات حصہ لیتے ہوئے

شعبہ فارسی کی پروگرام ایڈوایزر ڈاکٹر زہرہ خاتون نے استقبالیہ خطبہ پیش فرماکر جامعہ کے مختلف شعبوں سے شریکِ تقریب طلبا و اساتذہ کا شکریہ ادا فرمایا۔

پروگرام کے خصوصی رکن صدر شعبہ فارسی پروفیسر عبد الحلیم صاحب نے موجودہ ویجیلنس فریم ورک کے بارے میں گفتگو کرتے ہوئے ویجیلینس کی احتیاطی تدابیر کے آلات اور طریقوں پر توجہ مرکوز کرائی۔

جس میں انہوں نے کہا کہ حالیہ برسوں میں رقم کی ادائیگیوں اور خدمات کی ڈیجیٹلائزیشن نے عوام کو بااختیار بنانے، بدعنوانی کو کم کرنے اور مجموعی طرز حکمرانی میں کارکردگی کو بڑھانے میں اہم کردار ادا کیا ہے۔

دوسرے دن ، بروز جمعہ منعقدہ ڈیبیٹ مقابلہ میں ڈاکٹر مہر فاطمہ، شعبہ انگریزی، جامعہ ہمدرد نے بطورِ جج شرکت فرمائی ، انہوں نے بحث و تمحیص کے طریقہ کار کے اصول و قوانین پر بات کرتے ہوئے طلبا کی پوشیدہ صلاحیتوں کو ابھارنے کے لیے، اس قسم کے پروگراموں کے انعقاد پر شریک طلبا سمیت اراکین بزم دانشجویان فارسی کو مبارکباد پیش فرمائی۔

جامعہ ملیہ اسلامیہ کے شعبۂ فارسی میں اساتذہ خطاب کرتے ہوئے

 نعتیہ مقابلہ میں جج کے فرائض شعبہ اسلامک اسٹڈیز کے مہمان استاد ، ڈاکٹر محمد مسیح صاحب، محمد شبیب حسینی ، غزل سرائی کے مقابلے میں شعبہ اردو کے مہمان استاد ڈاکٹر جاوید حسن اور بیت بازی میں ڈاکٹر خالد مبشر صاحب نے انجام دئے ۔

 پروگرام میں شعبہ کے جملہ اساتذہ، پروفیسران، ممبران اور عملہ نے شرکت فرمائی ، جس میں اول الذکر ، ڈاکٹر سید کلیم اصغر، ڈاکٹر محسن علی، ڈاکٹر سرفراز احمد، ڈاکٹر یاسر عباس، ڈاکٹراحمد حسن، ڈاکٹر سید تصور مہدی، ڈاکٹر محمد نوید جعفری صاحبان وغیرہم خصوصی طور پر موجود رہے ۔

شعبہ فارسی کے سیمینار ہال میں، بروز جمعہ شام پانچ بجے تک مختلف مقابلہ جاتی پروگراموں میں اول، دوم، سوم پوزیشن حاصل کرنے والے طلبا کے ناموں کے اعلان کے ساتھ اس دو روزہ پروگرام کا ایم اے فارسی سال اول کے طالب علم مبارک علی کے کلماتِ تشکر پر اختتام ہوا۔

اس موقع پر بزم دانشجویان کے تمام کارکنان نے بڑی گرمجوشی کا مظاہرہ فرمایا، جس میں نائب صدر محمد شعیب، طارق عبید (سیکریٹری) عاقب جاوید (جوائنٹ سیکریٹری)، صفدر ، عبدالرحمن، شاہ خالد، ابو حمزہ، ندیم احمد، عائشہ وغیرہ شامل ہیں ۔ اور اس کئی نشستوں پر مشتمل پروگرام کی نظامت کے فرائض، محمد فیصل ، سمیر احمد ، عظیم اشرف صاحبان نے انجام دییے۔

Recommended