نیٹ پی جی کا امتحان 31 اگست تک ملتوی

سو دنوں تک کورونا ڈیوٹی دینے والوں کو باقاعدہ نوکری میں ترجیح ملے گی

نئی دہلی ، 04مئی ( انڈیا نیرٹیو)

 مرکزی حکومت نے نیٹ پی جی امتحانات کو 31 اگست تک ملتوی کرنے کا فیصلہ کیا ہے۔ اب یہ امتحان اکتوبر میں ہوسکتا ہے۔ اس کے ساتھ ہی ایم بی بی ایس طلبا کو کورونا ڈیوٹی پر لگانے کا بھی فیصلہ کیا گیا ہے۔ اس سلسلے میں مرکزی وزارت صحت نے تمام ریاستوں اور مرکزکے زیر انتظام علاقوں کو ایک خط لکھا ہے۔

وزارت نے تمام ریاستوں سے کہا ہے کہ وہ کووڈ کے خلاف جنگ میں ایم بی بی ایس طلبا کو شامل کرنے کی شروعات کریں۔ فائنل ایئر کے ایم بی بی ایس طلباکو سینئر ڈاکٹروں کی نگرانی میں ٹیلی کنسلٹیشن اور ہلکے کووڈ کیسوں کی نگرانی کرنے کی اجازت ہوگی۔ ریاستی کووڈ مینجمنٹ میں میڈیکل انٹرنس بھی تعینات کرسکتے ہیں۔ ملک میں وبائی مرض کے دوران مناسب انسانی وسائل کی بڑھتی ہوئی ضرورت کا جائزہ لینے کے بعد تمام طبی مراکز میں خالی آسامیوں کو فوری طور پر پر کرنے کی بھی ہدایت دی گئی ہے۔ اس میں کووڈ ڈیوٹی میں 100 دن مکمل کرنے والے ہیلتھ ورکرس کے لئے باقاعدہ ملازمتوںمیں ترجیح دینے کی بھی ہدایت دی گئی ہے۔

ریاستوں کو بتایا گیا ہے کہ وہ ٹیلی کنسلٹیشن اور ہلکے کووڈ-19 علامات کے مریضوں کی دیکھ بھال کے لیے ایم بی بی ایس فائنل ایئر کے طلبا کی خدمت حاصل کرسکتے ہیں۔ اسکے ساتھ ہی بی ایس سی نرسنگ اور نرسوں کی خدمات سینئر ڈاکٹروں کی نگرانی میں فل ٹائم نرسنگ ڈیوٹی کے لئے لی جاسکیںگی۔ اس کے ساتھ ہی 100دنوں تک کورونا ڈیوٹی مکمل کرنے والے میڈیکل اہلکاروں کو پی ایم کووڈ نیشنل سروس اعزاز سے سرفراز بھی کیا جائے گا۔قابل ذکر ہے کہ نیٹ کا پہلا امتحان 31 اگست کو ہونا تھا۔