Urdu News

یوپی اردو اکادمی کے سالانہ اعزاز کے لیے جموں کشمیر کے آٹھ ادیبوں کا انتخاب

اتر پردیش اردو اکیڈمی

اتر پردیش اردو اکیڈمی نے حال ہی میں سال 2019-21 کے ایوارڈز کا اعلان کیا ہے۔ ان میں جموں و کشمیر کے آٹھ ادیب شامل ہیں۔جموں و کشمیر سے اعزاز کے لیے منتخب ہونے والوں میں ڈاکٹر مشتاق احمد وانی، ڈاکٹر محی الدین زور کشمیری، ڈاکٹر گلشن عبداللہ، دیپک کنول، ڈاکٹر فیاض دین طیب، اشرف عادل، خالد بشیر تلگامی اور غلام نبی کمار شامل ہیں۔

یہ بات قابل ذکر ہے کہ اتر پردیش اردو اکادمی ہر سال اردو ادب، شاعری، صحافت، تنقید اور افسانہ نگاری میں بہترین خدمات انجام دینے والوں کو ایوارڈ دیتی ہے۔اس سے جموں و کشمیر کے ادبی حلقوں میں خوشی کی لہر دوڑ گئی ہے۔ نوجوان مصنف اور اسکالر سہیل سلیم کے مطابق، یو پی اردو اکیڈمی مبارکباد کی مستحق ہے۔ انہوں نے کہا کہ یہ خوش آئند بات ہے کہ جموں و کشمیر میں تخلیق کردہ ادب کو دیگر ریاستوں میں بھی پذیرائی مل رہی ہے۔

سہیل نے کہا کہ اس سے زیادہ خوشی کی بات کیا ہو گی کہ کشمیری لکھاریوں کو پڑھا اور سراہا جاتا ہے۔ اترپردیش اکیڈمی مبارکباد کی مستحق ہے۔اردو اکادمی اور اسے فروغ ادب کے لیے سنگ میل قرار دیا۔

اس اعزاز کے لیے منتخب ہونے والے ممتاز شاعر اشرف عادل نے یوپی اکادمی اردو کی اردو ادب کے تئیں خدمات کو سراہتے ہوئے کہا کہ یہ معیاری ادب کے فروغ میں بہت آگے جائے گا۔ انہوں نے اس اعزاز کے لیے منتخب کرنے پر اکیڈمی کا شکریہ ادا کیا۔انہوں نے کہا کہ یوپی اردو اکادمی اردو زبان و ادب کے فروغ کے لیے بہترین خدمات انجام دے رہی ہے۔ایوارڈ کے لیے کشمیری ادیبوں کا انتخاب اس بات کا منہ بولتا ثبوت ہے کہ جموں و کشمیر کے ادیب معیاری ادب تخلیق کر رہے ہیں۔

Recommended