جامعہ ملیہ اسلامیہ میں سات روزہ این ایس ایس کیمپ کاشاندارآغاز

اسلامی تعلیمات اور اسلامی قدریں سماجی اور فرقہ وارانہ ہم آہنگی پیداکرنے میں اہم رول اداکرسکتی ہیں :  پروفیسر وی کے ترپاٹھی

 جامعہ ملیہ اسلامیہ کے ڈپارٹمنٹ آف ٹیچر ٹریننگ اینڈ نان فارمل ایجوکیشن میں 15 تا21 دسمبر سات روزہ این ایس ایس کیمپ کا شاندار افتتاح عمل میں آیا۔افتتاحی تقریب فیکلٹی آف ایجوکیشن میں ہاکی گراؤنڈ میں ڈین فیکلٹی آف ایجوکیشن پروفیسر سارہ بیگم کی صدارت میں منعقد ہوئی۔پروگرام جامعہ کی روایت کے مطابق تلاوت کلام پاک اور جامعہ ترانہ سے شروع ہوا۔

صدرشعبہ پروفیسر جے سی ابراہم نے سبھی مہمانوں اور شرکاء کا خیرمقدم کرتے ہوئے اس کیمپ کے اغراض ومقاصد پر روشنی ڈالی۔آئی آئی ٹی دہلی کے مامورپروفیسروی کے ترپاٹھی بطورمہمان خصوصی تقریب میں شریک ہوئے۔انھوں نے اس موقع پر فرقہ وارانہ اور سماجی ہم آہنگی پر ایک توسیعی خطبہ بھی پیش کیا۔

اپنی خطاب میں انھوں نے قرآنی آیات اور احادیث کو پیش کرکے دلائل سے یہ ثابت کیا کہ اسلامی تعلیمات سماجی ہم آہنگی کو قائم کرنے میں بہت ہی موثر اور فعال کردار اداکرسکتی ہیں۔انھوں نے کہاکہ اسلامی قدریں سماجی تانے بانے کو مضبوطی عطاکرتی ہیں۔

پروفیسر سارہ بیگم نے اپنی صدارتی خطاب میں اس کیمپ کے ذریعے زیر تربیت معلمین میں اخلاق فاضلہ کی قدروں کو پروان چڑھانے، زندگی کے چیلنجوں کا سامنا کرنے اورزندگی کی بنیادی مہارتوں کے فروغ دینے پر زوردیا۔انھوں نے کہا کہ این ایس ایس طلباوطالبات اور نئی نسلوں میں ملک اورقوم کی خدمت کا جذبہ پیداکرنے کا اہم ادارہ ہے۔

این ایس ایس پروگروام آفیسر ڈاکٹر عابدنے بھی شرکا کو خطاب کیا اوراین ایس ایس کے تاریخی تناظر میں جامعہ کے رول پر کلیدی گفتگو کی۔انھوں نے کہاکہ جامعہ واحد یونیورسٹی ہے جہاں اتنے وسیع پیمانے پر خون کا عطیہ جمع کیا جاتاہے تاکہ وہ وقت پر ضرورت مند مریضوں کے کام آسکے۔

اس کیمپ کی کوآرڈینیٹرڈاکٹر روحی فاطمہ اور ڈاکٹررئیسہ خان نے بہت ہی منظم طریقے سے پروگرام کی تفصیلات واضح کیں اور اس کوموثر، جامع اور مفید بنانے کے لیے سبھی سے لگن سے کام کرنے کی اپیل بھی کی۔

اس خبر کو بھی پڑھ سکتے ہیں

اس میں اجتماعی طورپراین ایس ایس کا ترانہ بھی پیش کیا گیا۔اس کیمپ میں سی سی اےکے تحت وسیع پیمانے ثقافتی پروگرام بھی پیش کیے جائیں گے۔سی سی اےکوآرینیٹر زڈاکٹرتبسم نقی اور ڈاکٹر عارف محمد نے اس کا تفصیلی خاکہ شرکا کے سامنے پیش کیا۔واضح رہے کہ ایک ہفتہ تک چلنے والے اس کیمپ میں ملک کے مشہورماہرین تعلیم شرکت کریں گے۔

اس موقع پر فیکلٹی آف ایجوکیشن کے سبھی اساتذہ اور طلبا وطالبات پروگرام میں موجودتھے۔زیر تربیت معلمہ صالحہ نے آخرمیں سبھی مہمانوں اور شرکاء کا شکریہ اداکیا اور قومی ترانے پر پروگرام اختتام پذیر ہوگیا۔

اس خبر کو بھی پڑھ سکتے ہیں