بالی ووڈ اداکارراجپال یادو نے اپنی زبردست کامیڈی سے لوگوں کے دل جیت لیے ہیں۔ راجپال نے کئی بڑی فلموں میں مضبوط کردار ادا کیے ہیں۔ لیکن اسکرین پر سب کو ہنسانے والے راجپال کو حقیقی زندگی میں کئی مسائل کا سامنا کرنا پڑا ہے۔ ایک حالیہ انٹرویو کے دوران راجپال نے اپنی زندگی کے پریشان کن واقعات کا انکشاف کیا۔ راجپال نے اپنی پہلی بیوی کی موت کے بارے میں بتایا ہے۔
حال ہی میں راجپال نے ایک انٹرویو میں اپنی ذاتی زندگی کے واقعات کا انکشاف کیا ہے۔ راجپال نے کہا ’ میرے والد نے 20 سال کی عمر میں میری شادی کر دی تھی۔ شادی کے بعد میری پہلی بیوی نے بیٹی کو جنم دیا۔ اس دوران ان کی موت ہو گئی۔ مجھے اگلے دن ان سے ملنا تھا لیکن تب میں ان کی لاش کو اپنے کندھوں پر اٹھائے ہوئے تھا۔ میں اپنے خاندان کا شکریہ ادا کرتا ہوں ، اپنی ماں ، اپنی بھابھی ، میری بیٹی نے کبھی محسوس نہیں کیا کہ اس کی ماں نہیں ہے۔ اس نے بہت پیار سے اس کا خیال رکھا۔
راجپال کا مزید کہنا تھا کہ 1991 میں پہلی بیوی کی موت کے بعد انہوں نے بطور اداکار خود کو منوایا۔ مجھے 13 سال لگے۔ اس دوران میں نے این ایس ڈی میں تعلیم حاصل کی ، ٹی وی اور فلمیں کیں۔ سال 2000 میں راجپال کی فلم ’جنگلی ‘ ریلیز ہوئی تھی۔ اس فلم سے انہیں حقیقی کامیابی ملی۔
اپنی دوسری بیوی کے بارے میں بات کرتے ہوئے راجپال نے کہا ، ’ جب میں رادھا سے ملا تو میں 31 سال کا تھا۔ میں 2001 میں ہیرو کی شوٹنگ کے لیے کینیڈا میں تھا ، جہاں ہم پہلی بار ملے تھے۔ ایک دوسرے کو ڈیٹ کرنے کے بعد ہم نے 2003 میں دونوں خاندانوں کی رضامندی سے شادی کی۔
راجپال یادو نے اپنے کیریئر کا آغاز 1999 میں فلم ’دل کیا کرے ‘ سے کیا۔ اس کے بعد انہوں نے ’ کمپنی‘، ’ ہم کسی سے کم نہیں‘، ’ ہنگامہ‘،’ مجھ سے شادی کروگی‘، ’ میں میری پتنی اور وہ ‘،’اپنا سپنا منی منی ‘، ’ پھر ہیرا پھیری ‘ میں اداکاری کی۔ راجپال یادو’ پھر ہیرا پھیری ‘، ’ چپ چپکے ‘ اور ’ بھول بھولیا‘ جیسی سپر ہٹ فلموں میں نظر آئے۔
