ریلیز سے قبل ہی بالی ووڈ کی دو بڑے بجٹ کی فلمیں لال سنگھ چڈھا اور رکشا بندھن، جنہیں سوشل میڈیا پر بائیکاٹ کا سامنا ہے، باکس آفس پر دھڑام سے گر گئی ہیں۔ اگرچہ ان کے میکرز کو پوری امید تھی کہ لوگ بڑی تعداد میں فلمیں دیکھنے کے لیے سینما گھروں میں پہنچیں گے لیکن ان کی توقع کے برعکس دونوں فلموں کو شائقین کی کمی کے باعث اپنے کئی شوز منسوخ کرنے پڑے۔
11 اگست کو ریلیز ہونے والی سپر اسٹار عامر خان کی لال سنگھ چڈھا اور اکشے کمار کی رکشا بندھن نے باکس آفس پر بری کارکردگی دکھائی ہے۔ یہ فلمیں ریلیز کے چھ دنوں میں 50 کروڑ کا ہندسہ چھو نہیں سکیں۔ یوں تو یہ عامر اور اکشے بالی ووڈ کی ہٹ مشین مانے جاتے ہیں لیکن اب ان کواپنی فلموں کو کامیاب بنانے میں پسینے چھوٹ رہے ہیں۔
لال سنگھ چڈھا اور رکھشا بندھن کے مارننگ شو شائقین کی کمی کی وجہ سے منسوخ کیے جا رہے ہیں۔ ذرائع کے مطابق دونوں فلموں کے 30 فیصد شوز منسوخ کر دیے گئے ہیں۔ اپنی ریلیز کے چھٹے دن، لال سنگھ چڈھا نے اپنے شائقین میں زبردست کمی ریکارڈ کی۔ منگل کو فلم نے صرف 2.5 کروڑ روپے کمائے جس کے بعد اب تک اس کا کل کلیکشن 48.33 کروڑ روپے ہو چکا ہے۔ رکشا بندھن کی بات کریں تو یہ فلم چھ دنوں میں 40 کروڑ بھی نہیں کما سکی۔
قابل ذکر ہے کہ دونوں فلمیں 11 اگست کو سینما گھروں میں ریلیز ہوئی تھیں۔ لیکن دونوں فلموں کی ریلیز سے قبل سوشل میڈیا پر زبردست احتجاج کیا گیا اور ان کے بائیکاٹ کا مطالبہ کیا گیا۔ یہاں تک کہ کئی مقامات پر عامر خان کے خلاف مظاہرے ہوئے۔ وہیں سنت سماج کے کچھ لوگوں نے بھی عامر خان کے خلاف بولا اور کہا کہ جس طرح سے عامر خان ہندوستان میں خود کو محفوظ محسوس نہیں کرتے۔ اسی طرح اب ہم بھی ان کی فلم دیکھنا ضروری نہیں سمجھتے۔ ہم عوام سے اپیل کریں گے کہ وہ اس فلم کو دیکھ کر اپنا وقت اور پیسہ ضائع نہ کریں بلکہ سناتن دھرم سے متعلق کسی بھی کام میں حصہ دار بنیں۔
قابل ذکر ہے کہ سوشل میڈیا کی طاقت سے خوفزدہ عامر خان نے فلم کی ریلیز سے قبل کہا تھا کہ اگر ان کی کسی بات سے کسی کو تکلیف پہنچی ہے تو وہ معافی مانگنے کو تیار ہیں۔ لیکن یہ فلم میں صرف میں ہی نہیں، سینکڑوں لوگوں کی محنت ہے۔ اس کے ساتھ انہوں نے لوگوں سے فلم دیکھنے کی اپیل بھی کی۔
