اکشے کمار اور مانوشی چھلر کی آنے والی فلم ”سمراٹ پرتھوی راج“ سینما گھروں میں ریلیز کے لیے تیار ہے۔ اکشے ' سمراٹ پرتھوی راج کو باکس آفس پر کامیاب بنانے کے لیے فلم کی بھرپور تشہیر کر رہے ہیں۔ دریں اثنا  ریلیز سے صرف دو دن قبل دہلی میں فلم کی اسپیشل اسکریننگ ہوئی جس میں وزیر داخلہ امت شاہ نے شرکت کی، انہوں نے نہ صرف فلم دیکھی بلکہ دل و جان سے فلم کی تعریف بھی کی۔

ساتھ ہی اکشے کمار نے ٹویٹ کرکے وزیر داخلہ کا شکریہ ادا کیا ہے۔ اسکریننگ کی تصویر شیئر کرتے ہوئے اکشے نے ٹویٹ کیا، 'میرے لیے بہت جذباتی اور قابل فخر شام۔ عزت ماب وزیر داخلہ امت شاہ جی نے سمراٹ پرتھوی راج کو دیکھا، میں اس کے لیے بہت اعزاز محسوس کر رہا ہوں۔ ہماری فلم کے لیے ان کی تعریف نے ہماری کوششوں کو کامیاب بنایا! میں ہمیشہ شکر گزار رہوں گا۔

غور طلب ہے کہ آنے والی فلم ”سمراٹ پرتھویراج“ ایک تاریخی دور کی ڈرامہ فلم ہے۔ فلم میں اکشے کمار سمراٹ پرتھوی راج کے کردار میں ہوں گے۔ اداکارہ مانوشی چھلر نے راجکماری سنیوگیتا کے کردار میں، سنجے دت بطور ”کاکا کنہ“، سونو سود بطور راج کوی چند بردائی اور آشوتوش رانا جے چند کے کردار میں نظر آئیں گے۔ آدتیہ چوپڑا کی پروڈیوس کردہ اس فلم کے ہدایت کار چندر پرکاش دویدی ہیں۔ فلم ”سمراٹ پرتھوی راج‘ 3 جون 2022 کو ہندی، تامل اور تیلگو میں ریلیز ہوگی۔