یوم پیدائش پر خاص تحریر
فلمی دنیا میں ایک الگ اور خاص شناخت بنانے والے فلمی اداکار نانا پاٹیکر یکم جنوری 1951 کو کولابا، مہاراشٹر میں پیدا ہوئے۔ ان کا اصل نام وشوناتھ پاٹیکر ہے۔ ایک متوسط گھرانے سے تعلق رکھنے والے نانا پاٹیکر نے کالج کے دنوں میں اپنے خاندان کی مالی مدد کرنے کے لیے پڑھائی کے ساتھ ساتھ ایک ایڈورٹائزنگ ایجنسی میں کام کرنا شروع کیا۔ وہ دن میں کالج جاتے تھے اور شام کو ایک اشتہاری ایجنسی میں کام کرتے تھے۔
کام کے دوران نانا کی ملاقات ایک دن نیل کانتی سے ہوئی جو بعد میں ان کی بیوی بن گئیں۔ نیل کانتی اس وقت بینک میں کام کرتی تھیں۔ تاہم، وہ تھیٹر میں بھی دلچسپی رکھتی تھیں اور اسٹیج پر پرفارم بھی کر چکی تھیں ۔ دونوں کے درمیان قربتیں بڑھیں اور 1978 میں نانا اور نیل کانتی کی شادی ہوگئی۔
نانا پاٹیکر نے اپنے کیریئر کا آغاز 1978 میں فلم گامن سے کیا۔ اس کے علاوہ وہ مراٹھی سنیما میں چھوٹے موٹے کردار کرتے رہے۔ سادہ نظر آنے والے نانا نے اپنی غیر معمولی اداکاری سے سب کی توجہ حاصل کرلی۔ میرا نائر کی سلام بمبئی میں نانا کی اداکاری کو سب نے سراہا تھا۔ ہندی سنیما میں نانا پاٹیکر کی شناخت فلم پرندا سے بنی۔ یہ فلم نانا پاٹیکر کے کیریئر میں سنگ میل ثابت ہوئی اور انہیں بہترین معاون اداکار کا نیشنل فلم ایوارڈ ملا۔
نانا پاٹیکر کی اہم فلموں میں ترنگا، کرانتی ویر، خاموشی، یشونت، کوہرام، اب تک چھپن، اپرہرن، ٹیکسی نمبر9211 ، ویلکم، راجنیتی وغیرہ شامل ہیں۔ سال 2013 میں نانا پاٹیکر کو اداکاری کی دنیا میں ان کی خدمات کے لیے پدم شری ایوارڈ سے نوازا گیا۔
