امیتابھ بچن کی پہلی فلم’سات ہندوستانی’کوکتنے سال مکمل؟جانیے اس خبر میں

کروڑوں دلوں پر راج کرنے والے امیتابھ بچن کی پہلی فلم سات ہندوستانی کی ریلیز کو آج 53 سال مکمل ہو گئے۔ اس کے ساتھ ہی بگ بی نے انڈسٹری میں بھی اپنے 53 سال مکمل کر لیے ہیں۔ امیتابھ بچن نے اپنی پہلی فلم سات ہندوستانی 15 فروری 1969 کو سائن کی تھی اور یہ فلم آج کے ہی دن 7 نومبر 1969 کو ریلیز ہوئی تھی۔ خواجہ احمد عباس کی ہدایت کاری میں بننے والی اس ایکشن فلم میں امیتابھ بچن کے ساتھ اداکار مدھو، اتپل دت، جلال آغا اور اے کے ہنگل نے بھی کام کیا تھا۔

فلم سات ہندوستانی کے بعد امیتابھ بچن نے بہت سی فلموں میں شاندار اور یادگار اداکاری کی جن میں آنند، گڈی، باورچی، زنجیر، نمک حرام، سلسلہ، دیوار، ڈان، شعلے، پا، سرکار، بلیک، باغبان وغیرہ شامل ہیں۔ اس کے علاوہ امیتابھ بچن کو اپریل 2005 میں ایچ آئی وی/ایڈز اور پولیو کے خاتمے کی مہم کے لیے یونیسیف کا خیر سگالی سفیر مقرر کیا گیا تھا۔

امیتابھ کو 2001 میں پدم بھوشن اور 2019 میں دادا صاحب پھالکے ایوارڈ سے نوازا گیا۔ فی الحال امیتابھ سونی پر نشر ہونے والے شو ‘کون بنے گا کروڑ پتی’ سیزن 14 کو ہوسٹ  کر رہے ہیں۔ اس کے علاوہ امیتابھ بچن جلد ہی کئی  فلموں میں نظر آنے والے ہیں جن میں اونچائی، گنپت، پروجیکٹ کے، بٹر فلائی وغیرہ شامل ہیں۔