بڑے پردے پر دکھائی دے گا’سنگھم اگین‘کا جادو،ریلیز کی تاریخ  آئی سامنے

بالی ووڈ کے مشہور پروڈیوسر ہدایت کار روہت شیٹھی کی کاپ یونیورس کی اگلی فلم ’ سنگھم اگین ‘ 2024 میں ریلیز ہوگی۔ مداح اجے دیوگن کی فلم ’سنگھم اگین‘ کا بے صبری سے انتظار کر رہے ہیں۔ تاہم مداحوں کو اجے دیوگن اور ہدایت کار روہت شیٹھی کی اس فلم کے لیے مزید کچھ وقت انتظار کرنا پڑے گا۔

فلمی نقاد اور تجارتی تجزیہ کار ترن آدرش نے اپنے سوشل میڈیا ہینڈل پر ’ سنگھم 3‘ کی ریلیز کی تاریخ کے بارے میں بتایا ہے۔ ان کی طرف سے شیئر کی گئی معلومات کے مطابق ، ’ سنگھم اگین‘ 15 اگست 2024 کو ریلیز ہوگی۔

ترن آدرش نے اپنی پوسٹ میں لکھا ، ’اسپیشل: اجے دیوگن-روہت شیٹی یوم آزادی 2024 پر ’سنگھم اگین لے کر آئیں گے۔یہ روہت شیٹی کی انتہائی کامیاب سنگھم فرنچائز میں تیسری فلم ہے اور یہ 15 اگست 2024 کو یوم آزادی پر ریلیز ہونے والی ہے۔ اس کے علاوہ اس فلم کی شوٹنگ اس سال یعنی اگست 2023 میں شروع ہوگی۔

’ سنگھم اگین ‘ ’سنگھم‘ سیریز کی تیسری اور روہت شیٹی کاپ یونیورس کی پانچویں فلم ہے۔ اس کاپ یونیورس سے روہت شیٹی کی آخری ریلیز 2021 کی بلاک بسٹر’ سوریاونشی‘ تھی۔ اس کاپ فرنچائزی کا آغاز’ سنگھم ‘ سے ہوا جو 2011 میں ریلیز ہوئی۔

روہت جلد ہی  او ٹی ٹی  پر ایک ایکشن سیریز بھی شروع کریں گے ، جس میں سدھارتھ ملہوترا ، شلپا شیٹی اور وویک اوبرائے مرکزی کردار ادا کریں گے۔