ٹک ٹاک اسٹار پوجا چوہان کی خودکشی معاملے میں مہاراشٹر کے وزیرجنگلات سنجے راٹھور نے دیا استعفیٰ

شیوسنا لیڈر اور مہاراشٹر کی مہاوکاس آگھاڑی حکومت میں محکمہ جنگلات کے کابینی وزیر سنجے راٹھوڑ نے آج اپنا استعفیٰ مہاراشٹر کے وزیراعلیٰ ادھو ٹھاکرے کو سونپ دیا۔ ممبئی میں واقع وزیراعلیٰ کی سرکاری رہائش گاہ ورشا بنگلے پر وزیراعلیٰ مہاراشٹر ادھو ٹھاکرے سے اپنی بیوی کے ہمراہ ملاقات کرتے ہوئے راٹھوڑ نے وزیر اعلیٰ کو اپنا استعفیٰ سونپا۔ یاد رہے کہ بنجارہ سماج کے لیڈران نے راٹھوڑ کی مخالفت کی تھی۔

واضح رہے کہ 22 سالہ ٹک ٹاک اسٹار پوجا چوہان خودکشی معاملے میں وزیر اعلی ادھو ٹھاکرے خود راٹھوڑ کو استعفیٰ دینے کے لیے کہا تھا۔ شیوسینا ذرائع کے مطابق راٹھوڑ کو عہدے سے ہٹانے کے متعلق شیوسینا لیڈران کا ایک گروہ اندرونی طور پر خفا ہے۔ ان کا کہنا ہے کہ این سی پی کے ریاستی کابینی وزیر دھننجئے منڈے کو عصمت دری کے الزام کے بعد این سی پی نے نہیں ہٹایا تو راٹھوڑ کے معاملے میں جلد بازی کیوں کی جا رہی ہے۔

مہاوکاس آگھاڑی حکومت میں کانگریس سے کابینی وزیر بالاصاحب تھورات نے بھی راٹھوڑ کو ہٹانے سے متعلق بیان دیا تھا۔ اتحادی جماعتیں کانگریس اور این سی پی کا ماننا ہے کہ راٹھوڑ کو عہدے پر قائم رکھنے کے سبب مہاوکاس آگاڑی حکومت کی امیج پر اثر پڑسکتا ہے۔

 جب کہ این سی پی ذرائعے سے ملی اطلاعات کے مطابق راٹھوڑ کو شرد پوار سے مشورے کے بعد وزارت سے مستعفی ہونے کے لیے کہا گیا ہے۔22 سالہ ماڈل اور ٹک ٹاک اسٹار پوجا چوہان خود کشی معاملے پر مہاراشٹر بی جے پی صدر چندرکانٹ پاٹل نے واضح کیا تھا کہ جب تک راٹھوڑ کو کابینی وزارت کے عہدے سے نہیں ہٹایا جاتا تب تک اسمبلی کے بجٹ سیشن کی کاروائی نہیں چلنے دیں گے۔ بی جے پی نے چوہان خوکشی معاملے پر سڑک پر اتر کر احتجاج بھی کیا تھا۔

واضح رہے کہ پوجا چوہان نے 8 فروری کو پونہ میں ایک عمارت سے کود کر خودکشی کی تھی۔ ذرائع کے مطابق خود کشی کے ایک روز قبل ہی پوجا چوہان کا ایوت محل کے ایک سرکاری اسپتال میں اسقاط حمل کیا گیا تھا۔ اس معاملے کی کئی آڈیو کلپ سوشل میڈیا پر بھی گشت کر رہی ہیں۔ ایک کلپ میں جو شخص کیس کو ختم کرنے کی بات کر رہا ہے، مانا جارہا ہے کہ وہ سنجے راٹھوڑ ہی ہے۔ پوجا چوہان خودکشی معاملے میں سنجے راٹھوڑ کا نام سامنے آنے کے بعد شیو سینا پر راٹھوڑ کے استعفے سے متعلق دباوبڑھتا جا رہا تھا۔