برتھ ڈے اسپیشل 22 جنوری

سابق مس انڈیا فلم اداکارہ نمرتا شروڈکر 22 جنوری 1972 کو ممبئی میں پیدا ہوئیں۔ وہ فلم اداکارہ شلپا شروڈکر کی بہن ہیں۔ نمرتا شروڈکر نے اپنے کیریئر کا آغاز بطور ماڈل کیا۔ سال 1993 میں نمرتا نے مس  انڈیا کا خطاب جیتا جس کے بعد وہ سرخیوں میں آگئیں۔ یہ ٹائٹل جیتنے کے بعد نمرتا نے مس یونیورس مقابلے کے لیے بھی سخت محنت کی۔ لیکن یہاں وہ چھٹے نمبر پر رہیں۔

نمرتا نے بالی ووڈ کا رخ کیا اور 1998 میں سلمان خان اور ٹوئنکل کھنہ کی جب پیار کسی سے ہوتا ہے میں ایک چھوٹے سے کردار سے بالی ووڈ میں قدم رکھا۔ بالی ووڈ میں بطور لیڈ اداکارہ نمرتا کی پہلی فلم 'میرے دو انمول رتن' تھی۔اس فلم میں نمرتا کی اداکاری کو شائقین نے بے حد پسند کیا۔ اس کے بعد نمرتا کئی فلموں میں نظر آئیں۔ نمرتا شروڈکر کی چند نمایاں فلموں میں ہیرو ہندوستانی، کچے دھاگے، پکار، آواز، تیرا میرا ساتھ رہے، البیلا، دل ول پیار ویار، تہذیب، ایل او سی کارگل وغیرہ شامل ہیں۔

اسی دوران نمرتا کو 2000 میں تیلگو فلم 'وامسی' میں مرکزی کردار ادا کرنے کا موقع بھی ملا۔ اس فلم میں ان کے مقابل ساؤتھ کے سپر اسٹار مہیش بابو نظر آئے تھے۔ نمرتا پہلی بار تیلگو فلم میں کام کر رہی تھیں۔ نمرتا اور مہیش بابو فلم 'وامسی' کے سیٹ پر ملے اور محبت میں گرفتار ہوئے اور 4 سال تک ایک دوسرے کو ڈیٹ کرنے کے بعد انہوں نے شادی کا فیصلہ کیا اور 10 فروری 2005 کو خاندان کی رضامندی سے دونوں نے شادی کر لی۔    نمرتا شروڈکر اور مہیش بابو کے دو بچے ہیں بیٹا گوتم اور بیٹی ستارہ۔ شادی کے بعد نمرتا فلموں سے دور رہیں۔ وہیں مہیش بابو کا شمار ساؤتھ فلموں کے ٹاپ اداکاروں میں ہوتا ہے۔نمرتا شروڈکر بھلے ہی فلمی دنیا سے دور ہوں لیکن وہ اکثر سوشل میڈیا کے ذریعے اپنے مداحوں سے جڑی رہتی ہیں۔