فلم’کوڈ نیم ترنگا‘کا’راضی‘سے موازنہ کرنے پر پرینیتی  نے دیا یہ جواب

اداکارہ پرینیتی چوپڑا ان دنوں اپنی آنے والی فلم ’کوڈ نیم ترنگا‘ کی شوٹنگ میں مصروف ہیں۔ ان کی فلم ان دنوں کافی زیربحث  ہے۔ حال ہی میں ‘کوڈ نیم ترنگا’ کا ٹیزر ریلیز ہوا، جس کے بعد مداحوں نے اس فلم کا عالیہ بھٹ کی فلم ‘راضی’ سے موازنہ کرنا شروع کردیا۔ تنازعہ کو بڑھتے دیکھ کر اب پرینیتی چوپڑا نے اس پر وضاحت دی ہے۔

فلم میں پرینیتی پہلی بار ہارڈی سندھو کے ساتھ ایک سیکرٹ ایجنٹ کا کردار ادا کر رہی ہیں۔ فلم کے ٹیزر کے ریلیز ہونے کے بعد سوشل میڈیا پر بہت سے لوگوں نے لکھا کہ ‘کوڈ نیم ترنگا’ نے عالیہ بھٹ  کی راضی کی یاد تازہ کردی، کیونکہ انہوں نے راضی میں سیکرٹ ایجنٹ کا کردار بھی ادا کیا تھا۔

میڈیا سے بات چیت کے دوران پرینیتی نے اس موازنہ پر کھل کر بات کی۔ پرینیتی نے کہا، “میں یقین سے کہہ سکتی ہوں کہ دونوں فلموں میں کوئی مماثلت نہیں ہے کیونکہ راضی کا سیٹ اپ اور کہانی مختلف تھی، اور ہماری کہانی بالکل مختلف ہے۔ میں شروع سے ہی ایک ایجنٹ ہوں اور میرا مشن بھی مختلف ہے۔ یہ فلم مکمل طور پر اوریجنل فلم ہے“۔

اہم بات یہ ہے کہ کوڈ نیم ترنگا ایک ایکشن فلم ہے جس کی ہدایت کاری ریبھو داس گپتا نے کی ہے۔ پوری فلم پرینیتی کے کردار کے گرد گھومتی ہے، جو اپنے ملک کے لیے مشن پر  ہیں۔ فلم میں وہ زبردست ایکشن کے ساتھ بندوق چلاتی نظر آ رہی ہیں۔ فلم کا ٹیزر حال ہی میں جاری کیا گیا ہے۔