برتھ ڈے اسپیشل 29 جولائی

بالی ووڈ میں 'منا بھائی' کے نام سے مشہور اداکار سنجے دت 29 جولائی 1959 کو ممبئی میں پیدا ہوئے۔ سنجے دت آنجہانی بالی ووڈ اداکار سنیل دت اور نرگس کے بیٹے ہیں۔ سنجے دت کا پورا نام سنجے بلراج دت ہے۔ سنجے دت نے اپنے کیرئیر کا آغاز بطور چائلڈ آرٹسٹ 1971 میں ریلیز ہونے والی فلم ریشما اور شیرا سے کیا۔ اس وقت سنجے کی عمر صرف 12 سال تھی۔ یہ فلم ان کے والد سنیل دت نے ڈائریکٹ اور پروڈیوس کی تھی۔ اس فلم میں سنجے کو اپنے والد سنیل دت کے ساتھ ساتھ امیتابھ بچن، وحیدہ رحمان، ونود کھنہ، راکھی وغیرہ کے ساتھ اداکاری کا موقع ملا۔ اس فلم کے بعد سنجے دت کافی عرصے تک فلموں سے دور اپنی پڑھائی میں مصروف رہے۔ تقریباً 10 سال بعد، انہوں نے بالی ووڈ میں بطور مرکزی اداکار 1981 کی فلم راکی سے اپنے کیریئر کا آغاز کیا۔ یہ فلم باکس آفس پر سپر ہٹ ثابت ہوئی۔ سنجے دت کی والدہ نرگس اس فلم کی ریلیز سے قبل کینسر کی وجہ سے انتقال کر گئی تھیں۔سنجے دت اپنی والدہ کے بہت قریب تھے اور ان کی موت سے بہت ٹوٹ گئے تھے۔ ان کی ذاتی زندگی میں بہت سے اتار چڑھاؤ آئے۔

سنجے دت کو 1993 کے ممبئی بم دھماکوں کے کیس میں غیر قانونی اسلحہ رکھنے کے الزام میں گرفتار کر کے جیل بھیج دیا گیا تھا، جس سے سنجے کو بڑا دھچکا لگا تھا۔ 1993 کے ممبئی دھماکوں کے مقدمے کی سماعت 30 جون 1995 کو خصوصی ٹاڈا عدالت میں شروع ہوئی۔ تقریباً 12 سال بعد اس کیس کی سماعت 18 مئی 2007 کو ختم ہوئی۔ سنجے دت کو ٹاڈا کے الزامات سے بری کر دیا گیا تھا تاہم انہیں آرمس ایکٹ کے تحت 6 سال قید کی سزا سنائی گئی تھی۔ سنجے دت 25 فروری 2016 کو آرمس ایکٹ کے تحت سزا کاٹ کر باہر آئے تھے۔ سنجے کے اس برے وقت میں ان کی بیوی مانیتا نے ان کا ساتھ دیا اور خاندان کی ذمہ داری سنبھالی۔ ساتھ ہی سنجے دت نے بھی زندگی میں اتنی مشکلات کے باوجود ہمت نہیں ہاری اور بالی ووڈ میں کئی ہٹ فلمیں دیں۔ سنجے دت کی اہم فلموں میں نام، دو قیدی، کھلنائک، وجیتا، دشمن، داغ: دی فائر، حسینہ مان جائے گی، سندر، منا بھائی ایم بی بی ایس، پرینیتا، شادی نمبر ون، لگے رہو منا بھائی، ضلع غازی آباد، پرستھانم وغیرہ شامل ہیں۔

سنجے دت نے 1987 میں اداکارہ ریچا شرما سے شادی کی، جن سے ان کی ایک بیٹی تریشالا ہے۔ ریچا کا انتقال 1987 میں برین ٹیومر سے ہوا۔ رچا شرما کی موت کے بعد ان کی بیٹی تریشالا اپنے نانا نانی کے ساتھ امریکہ چلی گئی۔ 1998 میں سنجے نے ریا پلئی سے دوسری شادی کی لیکن ان کی طلاق ہو گئی۔ اس کے بعد سنجے دت نے 2008 میں مانیتا سے شادی کی۔ 21 اکتوبر 2010 کو وہ جڑواں بچوں کے باپ بنے اور ان کے بیٹے کا نام شہران اور لڑکی کا نام اقراء ہے۔کام کے محاذ پر سنجے دت جلد ہی فلم 'دی گڈ مہاراجہ' میں نظر آئیں گے۔