سالگرہ 26 اگست پر خصوصی پیش کش

مدھور بھنڈارکر آج ہدایت کاری کے میدان میں ایک جانا پہچانا نام ہے۔ 26 اگست 1968 کو ممبئی میں پیدا ہونے والے مدھر بھنڈارکر نے آج ہدایت کاری کے میدان میں بڑا مقام حاصل کیا ہے۔ لیکن انہوں نے یہ  مقام کافی جدوجہد کے بعد حاصل کیا۔

مدھر کے والد بجلی کے ٹھیکیدار تھے اور ماں گھریلو خاتون تھیں۔ گھر کی مالی حالت بہت خراب تھی جس کی وجہ سے مدھر کو اپنی پڑھائی درمیان میں ہی چھوڑنی پڑی لیکن انہیں بچپن سے ہی فلمیں دیکھنے کا شوق تھا۔

اس کے لئے انہیں کئی بار ڈانٹا گیا۔ مدھر نے اپنے کیریئر کا آغاز 90 کی دہائی میں کیا تھا۔ بہت جدوجہد کے بعد انہوں نے رام گوپال ورما کے ساتھ بطور اسسٹنٹ کام کرنا شروع کیا۔ اس وقت رام گوپال ورما فلم ’رات‘ بنا رہے تھے۔ اس کے بعد مدھر نے رنگیلا اور شیوا میں ان کی مدد کی۔ مدھر نے فلم رنگیلا میں بھی ایک چھوٹا سا کردار ادا کیا تھا۔ یہ فلم ہٹ رہی۔

اس کے بعد مدھر کو لگا کہ اب وہ فلم بنا سکتے ہیں۔ وہ اپنی فلم کی کہانی لے کر ایک پروڈیوسر کے پاس گئے۔ لیکن فلم کی کہانی سننے کے بعد پروڈیوسر نے تلخ جملوں کی بارش کرتے ہوئے ان کے ساتھ کام کرنے سے انکار کردیا جس کی وجہ سے انہیں گہرا صدمہ پہنچا۔ لیکن  انہوں نے ہمت نہیں ہاری اور سال 1999 میں ایک فلم بنائی جس کا نام ترشکتی تھا۔ اس فلم نے کچھ کمال نہیں دکھایا، جس کی وجہ سے رام گوپال کے اسسٹنٹ کے طور پر مدھر کا وقار بھی داو پر لگ گیا۔

پچھلی فلم کی ناکامی سے ٹوٹنے والے مدھر کا ایک دوست اسٹاک مارکیٹ میں کام کرتا تھا۔ ایک دن وہ مدھر کے ساتھ ڈانس بار گیا۔ مدھر کو اس وقت بہت شرمندگی محسوس ہو رہی تھی۔

مدھر کو ڈر تھا کہ اگر کوئی انہیں پہچان لے گا تو وہ کہہ دے گا کہ وہ فلم کی ناکامی کو بھلانے کے لئے شراب کی دکان پر آئے ہیں۔ اس کے بعد مدھر وہاں سے چلے گئے۔ لیکن رات بھر بار کا نظارہ اس کی آنکھوں میں رہا اور اگلے دن وہ خود ہی اپنے دوست کو بار میں لے گئے۔

اس کے بعد مدھر نے اس بار میں کام کرنے والی لڑکیوں کی کہانی سنی اور ایک مجموعہ تیار کیا۔ اس کے فوراً بعد وہ وقت آیا جب مدھر نے سب کچھ بھول کر فلم ‘چاندنی بار’ بنائی۔

اس فلم میں اداکارہ تبو مرکزی کردار میں نظر آئیں۔ یہ فلم مدھر کی زندگی کا ٹرننگ پوائنٹ ثابت ہوئی۔ اس فلم کی کامیابی نے انہیں ہندی فلموں کے مشہور ہدایت کاروں میں سے ایک بنا دیا۔ اس فلم کے لئے انہیں نیشنل ایوارڈ سے نوازا گیا۔

اس کے بعد  انہوں نے پیچھے مڑ کر نہیں دیکھا۔ مدھور بھنڈارکر کی اہم فلموں میں ترشکتی، ستا، پیج 3، کارپوریٹ، ٹریفک سگنل، فیشن، جیل، دل تو بچہ ہے جی، ہیروئن، اندو سرکار وغیرہ شامل ہیں۔ مدھر بھنڈارکر کو فلموں میں ان کی قابل ستائش خدمات کے لئے حکومت ہند نے 2016 میں پدم شری ایوارڈ سے نوازا تھا۔ مدھر بھنڈارکر اب بھی فلم انڈسٹری میں سرگرم ہیں۔

اپنی ذاتی زندگی کے بارے میں بات  کریں تو انہوں نے 15 دسمبر 2003 کو گرل فرینڈ رینو نمبودری سے شادی کی۔ مدھر اور رینو کی ایک بیٹی سدھی ہے۔ ورک فرنٹ کی بات کریں تو مدھر بھنڈارکر جلد ہی ناظرین کے سامنے فلم ببلی باؤنسر لانے والے ہیں، جو اس سال کے آخر تک ریلیز ہوگی۔