بارہ بنکی،(ابوشحمہ انصاری)

مسجد سے نماز کی ادائیگی کے بعد باہر آنے والے چار بچوں کو تیز رفتار بے قابو کار نے ٹکر مار دی اور سڑک کنارے درخت سے جا ٹکرائی۔شدید طور پر زخمی بچوں کو مقامی لوگوں نے جوائنٹ اسپتال سرولی غوث پور میں داخل کرایا۔ جہاں تین بچوں کو ڈاکٹروں نے مردہ قرار دے دیا۔جبکہ ایک کو تشویشناک حالت میں ڈسٹرکٹ ہسپتال ریفر کر دیا گیا۔  لیکن وہ بھی ہسپتال پہنچنے سے پہلے ہی دم توڑ گیا۔

 یہ واقعہ بدوسرائے قصبہ کا ہے۔اطلاع پر پہنچے گھر والوں کا رو رو کر برا حال ہو گیاہے۔

 کوتوالی بدوسرائے علاقہ میں جے ہند اسکول کے نزدیک مسجد میں صبح کی نماز پڑھنے کے لیے بہت سے لوگ آئے ہوۓ تھے۔نماز کی ادائیگی کے بعد، محمدخالد (14)محمد شاہ (14)محمد ریحان (14) اور محمد رٸیس(18) قصبہ بدوسرائے کے رہنے والے ہیں۔

صبح تقریباً 6 بجے فجر کی نماز ادا کرنے کے بعد اپنے گھر لوٹ رہے تھے۔چاروں بچے ایک ساتھ سڑک پر تھوڑا آگے بڑھے ہی تھے کہ ایک تیز رفتار کار نمبر یو پی 41 بی ای 2399 نے چاروں کو روند ڈالا اور سڑک کنارے درخت سے ٹکرا گئی۔اس حادثے میں چاروں بچے لہوں لہان سڑک پر گرنے کے بعد تڑپنے لگے۔

اسپتال پہنچنے سے پہلے ہوٸی موت۔اہل علاقہ کی اطلاع پر قریبی رشتہ دار بھی موقع پر پہنچ گئے۔سبھی نے فوری طور پر شدید زخمی بچوں کو علاج کے لیے سرولی غوث پور جوائنٹ اسپتال بھیج دیا۔جہاں پر موجود ڈاکٹروں نے زخمیوں کا علاج شروع کر دیا۔

علاج کے دوران حادثے میں زخمی ہونے والے محمد خالد، محمد ریحان، محمد شاہ دم توڑ گئے۔اسی دوران شدید طور پر زخمی محمد رئیس کو ابتدائی طبی امداد کے بعد ضلع اسپتال ریفر کر دیا گیا۔مگر ہسپتال پہنچنے سے پہلے اس نے بھی دم توڑ دیا۔