عالمی یوم صحت کے موقع پر دہلی میں واک تھان کا اہتمام

 عالمی یوم صحت کے موقع پر صحت اور خاندانی بہبود کی مرکزی وزارت نے نئی دہلی میں واک تھان کا اہتمام کیا۔ مرکزی وزیر صحت ڈاکٹر منسکھ منڈاویہ نے مرکزی وزیرمملکت برائے ڈاکٹر بھارتی پروین پوار کے ساتھ واک تھان کی قیادت کی۔

 اس تقریب کا انعقاد’صحت سب کے لیے‘ کے تھیم کے تحت کیا گیا تھا۔ واک تھان کا مقصد صحت مند عادات کے بارے میں آگاہی پیدا کرنا تھا تاکہ نہ صرف غیر متعدی امراض (این سی ڈی ایس) سے بچایا جا سکے بلکہ دماغی صحت پر مثبت اثرات مرتب ہوں۔

واک تھان میں شامل تقریباً 350 شرکاوجے چوک سے نرمان بھون پہنچے۔ شرکا نے طرز زندگی سے متعلق صحت کے مسائل، ہائی بلڈ پریشر، ذیابیطس، دماغی بیماری اور کینسر جیسی بیماریوں کو روکنے اور کنٹرول کرنے کے لیے ایک صحت مند اور فعال زندگی گزارنے کا عہد کیا۔

اس موقع پر ڈاکٹر منسکھ منڈاویہ نے سب کا شکریہ ادا کیا۔ انہوں نے کہا کہ یہ ہندوستان کا وسودھیوا کٹمبکم کا فلسفہ ہے جہاں ہم سب کی ترقی کے بارے میں سوچتے ہیں۔ یہ فلسفہ کورونا بحران کے دوران دیکھا گیا، جب ہندوستان نے کسی تجارتی منافع کو مدنظر رکھے بغیر ضرورت مند ممالک کو ویکسین اور ادویات فراہم کیں، طبی سامان فراہم کیا گیا۔

ہندوستان ہر اسٹیک ہولڈر کی مدد کے لیے سب سے آگے رہا ہے اور اسی جذبے کے تحت ہندوستان اپنے شہریوں اور دنیا کی صحت کے لیے کام کر رہا ہے۔

ملک کی ترقی میں صحت کی اہمیت پر روشنی ڈالتے ہوئے ڈاکٹر منڈاویہ نے کہا کہ وزیر اعظم کی قیادت میں ہندوستان نے صحت کو ترقی سے جوڑا ہے۔ صحت مند شہری ہی ایک صحت مند معاشرہ اور اس کے نتیجے میں ایک ترقی یافتہ قوم کی تعمیر کر سکتے ہیں۔