Urdu News

آیوش کے وزیر جناب سربانند سونووال نے اترا کھنڈ میں بنیادی ڈھانچہ کو جدید طرز پر ڈھالنے اور آیوش خدمات تک رسائی میں اضافے کی غرض سے کلیدی پہل قدمیوں کا اعلان کیا ہے

آیوش کے وزیر جناب سربانند سونووال

 

 
  • قومی آیوش مشن کے تحت سلسلے وار  پہل قدمیوں میں ، 10 بستروں والے 10  نئے آیوش  اسپتال، کوٹ دوار میں 50 بستروں والے جدید طرز  پر ڈھالے گئے  سرکاری آیوش  اسپتال اور  پیران کلیئر میں 50  بستروں والا ایک  یونانی  اسپتال قائم کرنا  شامل ہے۔
  • ریاست میں پہلے سے موجود اسپتالوں کے علاوہ  100 نئے آیوش  ویلنیس مراکز  قائم کرنے کی خاطر  مالی امداد کی فراہمی۔
  • اترا کھنڈ ریاستی سرکار کی ایک پہل آیوش  سمواد تقریب کے موقع پر آیوش  کے مرکزی وزیر جناب سربانند سونووال کی جانب سے اعلانات۔

آیوش کی وزارت نے آج اترا کھنڈ ریاست میں آیوش  سے متعلق  بنیادی ڈھانچے کو مستحکم بنانے کی غرض سے سلسلے وار  پہل قدمیوں کا اعلان کیا ہے۔ قومی آیوش  مشن  (این اے ایم)  کے تحت  اعلان کی گئی پہل قدمیوں کی بدولت  آیوروید، یونانی، نیچرو پیتھی،  ہربل میڈیسینز کو فروغ دینے اور آیوش  سے متعلق صنعتوں کی ترقی میں مدد ملے گی۔ اترا کھنڈ ریاست ، قدرتی وسائل اور آیوش  کے طور طریقوں سے متعلق درخشاں روایات  سے مالا مال ہے، جن میں اس خطے  کے عوام کی حفظان صحت  اور طبی  ضروریات  سے تعاون  کرنے کی صلاحیتیں موجود ہیں۔

 

آیوش سمواد پروگرام کے مہمان خصوصی کی حیثیت سے آیوش، بندرگاہوں، جہاز رانی اور آبی گزر گاہوں کے مرکزی وزیر جناب سربانند سونووال نے ریاست میں آیوش  سے متعلق بنیادی ڈھانچہ کی  توسیع اور اسے جدید  طرز پر ڈھالنے کے سلسلے میں سلسلے وار  پہل قدمیوں کا اعلان کیا۔ اترا کھنڈ کے وزیراعلیٰ  جناب پشکر سنگھ دھامی  بھی اس موقع پر موجود تھے۔

 اجتماع سے خطاب کرتے ہوئے جناب  سونووال نے کہا کہ  اگلی دہائی میں اترا کھنڈ  میں آیوش  اور سیاحت کے شعبے میں زبردست  ترقی ہوگی۔ حکومت ہند  نے ریاست  میں مختلف  اسکیموں کے ذریعہ ایک لاکھ کروڑ روپے  کی سرمایہ کاری کی ہے اور وہ اترا کھنڈ  کو ایک ترقی  یافتہ ریاست بنانے کے مقصد سے ٹھوس کوششیں  کرر ہی ہے۔ اترا کھنڈ  ایک مواقع  اور امکانات  کی سرزمین ہے اور اس کے مالا مال حیاتیاتی  تنوع  کی وجہ  سے، اس میں ریاست کی مجموعی ترقی میں تعاون کرنے کے  بے پناہ مواقع ہیں۔ مجموعی بنیادی ڈھانچے کو مستحکم بنانے کے مقصد سے ، حکومت   ہند ریاستی سرکار کے ساتھ مل کر مختلف اسکیموں پر عمل در آمد  کرنے  کے لئے اترا کھنڈ   وادی میں مختلف  اقدامات کرے گی۔

ان پہل  قدمیوں  اور آج  سرمایہ کاری میں اضافے  سے متعلق  اعلان کی وجہ سے  آیوش  کے شعبے میں ترقی  کی رفتار کو تیز تر کرنے میں مدد ملے گی۔  آیوروید سے  متعلق  اہم تعلیم تک رسائی کو یقینی بنانے کے ساتھ ساتھ  اترا کھنڈ آیور وید  یونیورسٹی  میں ‘‘مارما چکتسا’’ تربیتی  مرکز بھی قائم کیا جائے گا۔ یہ مرکز  ملک کے لئے ایک  نوڈل ایجنسی  کے طور پر  کام کرے گا،  جس سے پورے ملک  اور دنیا بھر  کے طلباء کو، آیوروید میں خصوصی تعلیم کی حصولیابی میں مدد ملے گی۔ وزیر موصوف نے کہا کہ ‘‘اس پلیٹ فارم کے ذریعہ، میں  ہر شخص پر  زور دیتا ہوں کہ وہ  ‘ایک قوم – ایک بھارت’ کے نظریہ کو  درست بنانے کی سمت میں کام کریں’’۔

دیگر اعلانات میں ریاست میں 10  بستروں والے اسپتال قائم کرنا۔ کوٹ دوار میں 50  بستروں والے آیوش اسپتال کو جدید طرز  پر ڈھالنا، ہری دوار میں پیران کلیئر کے مقام پر  50 بستروں والا  ایک یونانی  اسپتال، دوئی والا  کے مقام پر گورنمنٹ  ہومیو پیتھک میڈیکل کالج کا قیام،  ہر ضلع  میں موبائل آیوش یونٹوں (آیوش رتھ)  کا انتظام کرنا  تاکھ  عام لوگوں تک آیوش  خدمات  کی دستیابی  میں اضافہ کیا جاسکے، ریاست  میں پہلے  سے موجود  مراکز  کے علاوہ  مزید 100  آیوش  ویلنیس مراکز  قائم کرنا تاکہ  لوگوں تک آیوش  خدمات  کی رسائی  اور دستیابی  میں اضافہ کیا جاسکے۔

 پروگرام کے دوران،  اس بات کا بھی اعلان کیا گیا کہ ریاست میں عام طور پر  دستیاب علاج  معالجہ سے متعلق  پودوں کے استعمال کو مقبول بنانے کی غرض سے  ‘‘نیشنل میڈیسینل پلانٹس بورڈ ’’  (این ایم  پی بی) ، جڑی  بوٹیوں سے متعلق  200  اسکول ،ہربل باغات  کی مدد  کرے گا تاکہ طلباء  کے مابین  اس سلسلے میں بیداری  پیدا کی جاسکے۔ این ایم پی بی ، اترا کھنڈ میں کسانوں کو پودے لگانے سے متعلق  معیاری  ضروری  سامان فراہم کرنے کی غرض سے  13  اضلاع  میں 13  نرسریوں کو مدد فراہم کرے گا۔ قدر میں اضافے، جڑی بوٹیوں کو سکھانے ، گودام  کے بندو بست  اور  طبی  علاج  میں کام آنے والے پودوں  کے لئے مارکیٹنگ سے متعلق  بنیادی  ڈھانچہ کو بہتر بنانے کے مقصد  سے مقامی کلسٹر  قائم کرنے کی خاطر  فی کسان گروپ  15  لاکھ  روپے  کی  امداد  دی جائے گی۔ اس کے علاوہ  ‘‘مرماچکتسا’’ میں اتر اکھنڈ آیوروید  یونیورسٹی  کو  ملک بھر کے لئے ایک نوڈل ایجنسی  بنایا جائے گا۔

اس موقع پر جناب  پشکر سنگھ دھامی  نے کہا کہ  اترا کھنڈ  سرکار،  روایتی  طریق علاج سے متعلق  شعے میں صلاحیتوں اور وسائل  کو مستحکم  بنانے کی غرض سے  قومی  آیوش  مشن  کی مدد میں اضافہ کرے گی۔ اب جب کہ ہم اترا کھنڈ  ریاست کے قیام  کے 25  سال مکمل ہونے  کا جشن منا رہے ہوں گے، ہم نے  ریاست کی ترقی کی خاطر  ایک نقش راہ   تیار کیا ہے۔ اور مرکزی حکومت  اور ریاستی  سرکار کی  مشترکہ  کوششوں  سے اترا کھنڈ  ریاست،  آیوش،  حفظان صحت ، سیاحت اور  تعلیم  سمیت  مختلف شعبوں میں ترقی  یافتہ ریاستوں میں سے  ایک بن جائے گی۔

Recommended