نئی دہلی، 20 جنوری (انڈیا نیرٹیو)

ملک میں ایک بار پھر کورونا کیسز تیزی سے بڑھ رہے ہیں۔ جمعرات کی صبح تک گزشتہ 24 گھنٹوں میں تین لاکھ 17 ہزار 532 نئے کورونا مریض سامنے آئے ہیں۔ اس دوران صحت یاب ہونے والے مریضوں کی تعداد دو لاکھ 23 ہزار 990 ہے۔وہیں 491 کورونا متاثرین کی موت ہوئی ہے۔

جمعرات کو مرکزی وزارت صحت کی طرف سے جاری کردہ اعداد و شمار کے مطابق ملک میں کورونا سے صحت یاب ہونے والوں کی کل تعداد تین کروڑ 58 لاکھ 7 ہزار 29 ہے۔ اس دوران کورونا سے صحت یاب ہونے کی شرح 93.69 فیصد پر آگئی ہے۔ ملک میں فعال مریضوں کی تعداد 19 لاکھ 24 ہزار 51 ہوگئی۔اس کے ساتھ ہی روزانہ انفیکشن کی شرح 16.41 فیصد تک پہنچ گئی ہے۔

آئی سی ایم آر کے مطابق گزشتہ 24 گھنٹوں میں 19.35 لاکھ سے زیادہ ٹیسٹ کیے گئے۔ اب تک کل 70 کروڑ 93 لاکھ ٹیسٹ کیے جا چکے ہیں۔

ملک میں اومیکرون کے 9287 متاثرین کی تصدیق

ملک میں کورونا کے نئے ویرینٹ اومیکرون کی رفتار بڑھ گئی ہے۔ ملک بھر میں اومیکرون کے 9 ہزار 287 کیسز کی تصدیق ہوئی ہے۔ گزشتہ 24 گھنٹوں میں اومیکرون کے نئے کیسز میں 3.63 فیصد اضافہ ہوا ہے۔ اب تک ملک میں اومیکرون سے ایک شخص کی ہلاکت کی تصدیق ہوئی ہے۔

مرکزی وزارت صحت نے جمعرات کو جاری کردہ اعداد و شمار میں کہا کہ اومیکرون اب ملک کی 28 ریاستوں اور مرکز کے زیر انتظام علاقوں میں پھیل چکا ہے۔ اومیکرون کے سب سے زیادہ کیس مہاراشٹر میں رپورٹ ہو رہے ہیں۔

ملک میں 159.67 کروڑ ویکسین لگائی گئیں

کورونا کے خلاف جنگ میں موثر ویکسی نیشن مہم کے تحت ملک میں گزشتہ 24 گھنٹوں میں تقریباً 73 لاکھ ویکسین لگائی گئیں۔ اس کے ساتھ ہی ملک میں اب تک 159.67 کروڑ ویکسین لگائی جا چکی ہیں۔

مرکزی وزارت صحت کے مطابق جمعرات کی صبح تک ریاستوں اور مرکز کے زیر انتظام علاقوں کو ویکسین کی 158.96 کروڑ خوراکیں مفت فراہم کی گئی ہیں۔ ریاستوں کے پاس اب بھی ویکسین کی 12.72 کروڑ خوراکیں موجود ہیں۔