نئی دہلی، 25 جنوری (انڈیا نیرٹیو)

ملک میں کورونا کے معاملے میں معمولی کمی کے آثار ہیں۔ منگل کی صبح تک گزشتہ 24 گھنٹوں میں کورونا کے 2 لاکھ 55 ہزار 874 نئے مریض سامنے آئے۔ اس دوران کورونا کو شکست دینے والوں کی تعداد دو لاکھ 67 ہزار 753 ہوگئی۔ تاہم اسی عرصے میں 614 کورونا متاثرین کی موت ہوگئی۔

منگل کو مرکزی وزارت صحت کے جاری کردہ اعداد و شمار کے مطابق ملک میں کورونا سے صحت یاب ہونے والوں کی کل تعداد تین کروڑ 70 لاکھ 71 ہزار 898 ہے۔ اس دوران کورونا سے صحت یابی کی شرح معمولی بہتری کے ساتھ بڑھ کر 93.15 فیصد ہوگئی ہے۔ ملک میں فعال مریضوں کی تعداد 22 لاکھ 36 ہزار 842 ہوگئی۔جبکہ روزانہ انفیکشن کی شرح 15.52 فیصد ہے۔

آئی سی ایم آر کے مطابق گزشتہ 24 گھنٹوں میں 16 لاکھ 49 ہزار سے زیادہ ٹیسٹ کیے گئے۔ اب تک کل 71 کروڑ 88 لاکھ ٹیسٹ ہو چکے ہیں۔

ملک میں 162.92 کروڑ ویکسین لگائی گئیں

کورونا کے خلاف جنگ میں موثر ویکسینیشن مہم کے تحت ملک میں گزشتہ 24 گھنٹوں میں 62 لاکھ کے قریب ویکسین لگائی گئیں۔ اس کے ساتھ ملک میں اب تک 162 کروڑ 92 لاکھ ویکسین لگائی جا چکی ہیں۔

مرکزی وزارت صحت کے مطابق منگل کی صبح تک ریاستوں اور مرکز کے زیر انتظام علاقوں کو ویکسین کی 162 کروڑ 97 لاکھ خوراکیں مفت دستیاب کرائی گئی ہیں۔ ریاستوں کے پاس اب بھی ویکسین کی 13 کروڑ، 42 لاکھ خوراکیں موجود ہیں۔