ڈاکٹر کے کے اگروال کورونا سے جنگ ہار گئے ، انہوں نے ایمس میں آخری سانس لی

نئی دہلی ، 18 مئی (انڈیا نیرٹیو)

 پدمشری ڈاکٹر کے کے اگروال کورونا انفیکشن کی وجہ سے چل بسے ۔ اس خبر کی تصدیق کرتے ہوئے ، ایمس کے سابق آر ڈی اے صدر ڈاکٹر امریندر ملیہی نے کہا کہ ڈاکٹر کے کے اگروال نے پیر کی رات آخری سانس لی۔ 

قابل ذکر ہے کہ ڈاکٹر کے کے اگروال نے 28 اپریل کو اپنے ٹویٹر اکاونٹ پر بتایا تھا کہ وہ کورونا میں مبتلا ہیں۔ جس کے بعد انہیں دہلی کے ایمس میں داخل کرایا گیا۔ ہارٹ کیئر فاونڈیشن آف انڈیا کے صدر اور انڈین میڈیکل ایسوسی ایشن کے سابق ڈائریکٹر اگروال ، لوگوں کو کورونا کی پہلی لہر سے واقف کر رہے تھے اور طبی مشوروں کے ساتھ ساتھ طبی مریضوں کی حوصلہ افزائی کررہے تھے۔ 

ایمس کے ڈاکٹر اور آر ڈی اے کے سابق صدر ڈاکٹر امریندر ملیہی نے کہا کہ ڈاکٹر کے کے اگروال کی رخصتی طبی دنیا کے لیے ایک بڑا صدمہ ہے۔ ہم نے ایک اچھے ڈاکٹر کے ساتھ ساتھ ایک اچھے مواصلاتی اور مخیر شخص بھی کھودئے۔

پدم شری ایوارڈ یافتہ اور انڈین میڈیکل ایسوسی ایشن (آئی ایم اے) کے سابق صدر ڈاکٹر کے کے اگروال کا کورونا وائرس سے انتقال ہوگیا وہ 62 برس کے تھے مسٹر اگروال کے انتقال کی خبر ان کے آفیشل ٹویٹر اکاؤنٹ پر دی گئی ہے ٹویئٹر پر جاری بیان میں کہا گیا ہے ’’ بے حد دکھ کے ساتھ یہ آگاہ کیا جارہا ہے کہ ہمارے عزیز ڈاکٹر کے کے اگروال کا کووڈ ۔19 کے ساتھ طویل جنگ کے بعد 17 مئی کی رات 11.30 بجے نئی دہلی میں انتقال ہوگیا۔ وہا یہاں ایمس میں زیر علاج تھے اور گزشتہ چند دنوں سے وینٹی لیٹر پر تھے۔

بیان میں کہا گیا ہے کہ پدم شری ایوارڈ یافتہ کے کے اگروال نے اپنی زندگی عوامی فلاح و بہبود اور طبی بیداری کو اجاگر کرنے کے لیے وقف کردی تھی۔ وہ ماہر امراض قلب تھے ۔ انہیں 2005 میں ڈاکٹر بی سی رائے ایوارڈ اور 2010 میں پدم شری ایوارڈ سے نوازا گیا تھا۔

ڈاکٹر کے کے اگروال پانچ ستمبر 1958 میں پیدا ہوئے۔ انہوں نے اپنی اسکولی تعلیم دہلی سے حاصل کی اور ناگپور یونیورسٹی سے ایم بی بی ایس کیا۔انہوں نے وبائی امراض کے دوران عوام کو بیدار کرنے کے لیے مستقل کوششیں کیں اور متعدد ویڈیوز اور تعلیمی پروگراموں کے ذریعے 100 ملین سے زیادہ افراد تک پہنچنے میں کامیاب رہے اور لاتعداد جانوں کو بچایا۔