کشمیر:’انجمن بلڈ ڈونرز گروپ‘ کے تحت خون عطیہ کا مشن جاری،یہ نوجوان ہیں متحرک

سرینگر، 25 مئی (انڈیا نیرٹیو)

 سری نگر ضلع میں نوجوانوں کا ایک گروپ واٹس ایپ گروپ کے ذریعے خون کے عطیہ کی مہم چلا رہا ہے۔ ’’انجمن بلڈ ڈونرز‘‘ خون کے عطیہ کی ایک پہل ہے جو لوگوں کی زندگیاں بچانے کے لیے کچھ نوجوانوں نے شروع کی ہے۔ گروپ کے ایک ایڈمن طاہر علی نے یہ معلومات دی ہے۔

پیشے سے  ایک پولیس اہلکار طاہر نے بتایا کہ واٹس ایپ گروپ کے ذریعے خون کے عطیہ کی مہم چار سال قبل شروع کی گئی تھی اور اب تک اس نے ضرورت مند مریضوں کے لیے 3000 سے زیادہ بلڈ یونٹس کا انتظام کیا ہے۔ انہوں نے کہا کہ میں بھی 2005 سے خون کا عطیہ دے رہا ہوں۔

طاہر نے اب تک 48 بلڈ یونٹس عطیہ کیے ہیں۔ انہوں نے کہا کہ ہم سب کو اس مقدس مشن میں ہاتھ بٹانا چاہیے اور جانیں بچانی چاہئیں۔ ہم ان تمام لوگوں کو خوش آمدید کہتے ہیں جو خون کا عطیہ دینا چاہتے ہیں۔ جن کو خون کی ضرورت ہے وہ ہمارے گروپ سے بھی رابطہ کر سکتے ہیں۔

ایک اور ایڈمن، سمیر مصطفیٰ نے کہا کہ یہ گروپ 800 خون عطیہ کرنے والوں پر مشتمل ہے جس میں مرد اور خواتین دونوں شامل ہیں۔ انہوں نے کہا کہ ہم ضرورت مند مریضوں کے لیے خون، پلازما اور پلیٹلیٹس کا بندوبست کرتے ہیں۔

ایک رکن، مجتبیٰ حسین نے کہا کہ ہمارا مقصد جان بچانا ہے کیونکہ ہم حادثات اور دیگر ہنگامی حالات کا مشاہدہ کرتے ہیں جن میں روزانہ کی بنیاد پر خون کی ضرورت ہوتی ہے۔  ہم اپنے رضاکاروں کے ساتھ جو متعدد جگہوں پر پھیلے ہوئے ہیں۔ ہمیشہ ضرورت مندوں کو خون کا عطیہ دینے کی کوشش کرتے ہیں۔

ایک اور رکن حذیف نے کہا کہ ہمارا تعلق کسی تنظیم سے نہیں ہے۔ ہم رضاکاروں کی ایک ٹیم ہیں جو ضرورت مند مریضوں کے لیے خون، پلازما اور پلیٹلیٹس کا فوری بندوبست کرتے ہیں۔

ہم اپنے واٹس ایپ گروپ میں 800 ممبران (خون کے عطیہ دہندگان) کو شامل کرنے میں کامیاب رہے۔  ہم دوسرے عطیہ دہندگان کے ساتھ مل کر اللہ اور انسانیت کی خاطر بلا معاوضہ خون کا عطیہ دیتے ہیں۔