ریاض،21اکتوبر (انڈیا نیرٹیو)

سعودی عرب نے 18 سال اور اس سے زائد عمر کے شہریوں پر زور دیا ہے کہ وہ جلد از جلد کرونا وائرس کی تیسری ویکسین کو بطور بوسٹر ٹیکا لگوا لیں تاکہ کرونا وائرس کے خلاف موثر مدافعت ممکن ہوسکے۔

سعودی وزارت صحت کے ٹوئٹر پر جاری ہدایات کے مطابق "18 سال یا اس سے زائد عمر کے سعودی شہری جن کی دوسری ویکسین کو چھ ماہ کا عرصہ بیت گیا ہے وہ بوسٹر ویکسین کے لئے 'توکلنا' اور 'صحتی' ایپلیکیشن کے ذریعے سے اپوائنٹ منٹ   لے سکتے ہیں۔"

وزارت صحت نے زور دیا کہ "جن افراد کے مدافعتی نظام کمزور ہیں یا وہ بیمار ہیں انہیں ہدایت دی جاتی ہے کہ جلد از جلد اضافی ڈوز لگوا لیں تاکہ کرونا سے محفوظ رہ سکیں۔

سعودی عرب نے پچھلے ہفتے کے دوران کیکرونا وائرس کی پابندیوں میں نرمی کرتے ہوئے عوامی اجتماعات کی اجازت دے دی تھی اور دونوں ویکسین لگوانے والے افراد کے لئے ماسک لگانے کی پابندی میں بھی نرمی کر دی تھی۔وزارت صحت کے بیان کے مطابق 'ویکسین یافتہ افراد کھلے مقامات پر ماسک کے بغیر جا سکتے ہیں مگر بند جگہوں اور توکلنا ایپ پر غیر موجود جگہوں پر ابھی بھی ماسک لگانے کی پابندی ہے۔'

اس سے پہلے ماہ اگست میں ویکسین نہ لگوانے والے افراد پر عوامی مقامات میں داخلے کی پابندی لگا دی گئی تھی۔بدھ کے روز سعودی عرب میں کرونا کے 47 نئے کیسز سامنے آئے جس کے بعد مملکت میں سامنے آنے والے کیسز کی مجموعی تعداد 5 لاکھ 48 ہزار 65 تک پہنچ گئی ہے۔ سعودی انتظامیہ کے مطابق کرونا وائرس کی 4 کروڑ 40 لاکھ ویکسینز لگا دی گئی ہیں۔