نئی دہلی ، 20 مئی  ہندوستان کے مغربی ساحل پر سمندری طوفان توکتے کے دوران لہروں میں پھنس کرافکانس کمپنی کے جہازپی 305 ڈوبنے کے بعد اب تک 37 افراد کی لاشیں برآمد ہوچکی ہیں جبکہ 38 افراد لاپتہ ہیں۔ ان سب کی تلاش میں ، بحریہ نے مسلسل چوتھے روز بھی امدادی کارروائی جاری رکھی ہے۔ تمام 186 بازیاب عملہ کو دیر رات تک ممبئی بندرگاہ لایا گیا ہے۔ 

بحریہ نے ریسکیو آپریشن میں بچائے گئے 186 افراد میں سے 125 عملہ اور 04 لاشوں کو بدھ کی صبح آئی این ایس کوچی ممبئی بندرگاہ پہنچایا ۔ آئی این ایس کولکاتہ بدھ کی رات ممبئی بندرگاہ پہنچا۔ 

ممبئی ہائی کے قریب تیل کی تلاش کے کام میں مصروف جہاز پی 305 بحیرہ عرب میں سمندریطوفان کے باعث پیر کو سمندر میں بہہ گیا تھا۔ او این جی سی نے پیر کے روز بتایا کہ ا فکانس کے جہاز پی 305 میں 273 عملہ تھے لیکن بعد میں اس کی تعداد 261بتائی گئی۔ ہندوستانی بحریہ اور کوسٹ گارڈ نے بحری جہاز میں سوار 261 اہلکاروں کو بچانے کے لئے پیر کی شام دیر رات آپریشن شروع کیا۔ اس کے باوجود ، پی 305 جہاز سمندر میں تیز لہر کے باعث ممبئی سے 35 میل دور ڈوب گیا۔ بحریہ نے تین روزہ امدادی کارروائی میں 186 ملازمین کو بحفاظت بچا لیاہے۔