ممبئی سے ایک فون کال سے ہنگامہ: تین ریلوے اسٹیشن اور امیتابھ بچن کے بنگلے کو بم سے اڑانے کی دھمکی

ممبئی: پولیس کو ممبئی کے تین بڑے ریلوے اسٹیشن اور صدی کے عظیم فنکار امیتابھ بچن کے بنگلے کو بم سے اڑانے کی دھمکی بھرے کال(Mumbai Bomb Threat Call) موصول ہوئے ہیں۔ لہٰذا پولیس نے ان سبھی مقامات پر سیکورٹی انتظامات کو مزید بڑھا دیئے ہیں۔ حالانکہ تلاشی مہم کے دوران اب تک کچھ بھی مشتبہ نہیں ملا ہے۔ فی الحال پورے معاملے کی جانچ مسلسل کی جارہی ہے۔

نیوز ایجنسی پی ٹی آئی سے بات چیت کرتے ہوئے ایک پولیس افسر نے کہا کہ ممبئی پولیس کے اہم کنٹرول روم کو جمعہ کی شب فون آیا، جس میں فون کرنے والے نے کہا کہ بم چھترپتی شیوا جی مہاراج ٹرمنلس (سی ایس ایم ٹی)، بھائے کھلا، دادر ریلوے اسٹیشن اور اداکار امیتابھ بچن کے جوہو واقع بنگلے پر رکھے گئے ہیں۔

تلاشی مہم چلائی گئی

افسر نے مزید کہا، ’کال ملنے کے بعد سرکاری ریلوے پولیس، ریلوے پروٹیکشن فورس (آر پی ایف) بم ڈیٹکشن اینڈ ڈسپوزل اسکواڈ، ڈاگ اسکواڈ اور مقامی پولیس اہلکار ان مقامات پر پہنچے اور تلاشی مہم چلائی۔

پولیس افسر نے مزید کہا، ’ان مقامات پر اب تک کچھ بھی مشتبہ نہیں ملا ہے، لیکن وہاں بھاری پولیس تعینات کی گئی ہے۔ آگے کی جانچ جاری ہے۔