بی جے پی کی قومی ایگزیکٹو باڈی کی میٹنگ : وزیر اعظم کا خطاب

وزیر اعظم نریندر مودی نے منگل کو کہا کہ ہندوستان کا بہترین دور آنے والا ہے۔ ہمیں اس کی ترقی کے لئے خود کو وقف کرنا چاہیے۔ زندگی کے ہر لمحے کو ہندوستان کی ترقی کی کہانی میں گزارنے کا مطالبہ کرتے ہوئے انہوں نے کہا کہ اس امرت کال کو ’کرتویہ کال‘ میں تبدیل کرکے ہی ملک کو تیزی سے آگے بڑھایا جا سکتا ہے۔

بی جے پی کے سینئر لیڈر اور مہاراشٹرا کے نائب وزیر اعلیٰ دیویندر فڑنویس نے ایک پریس کانفرنس میں کہا کہ بی جے پی کی قومی ایگزیکٹو میٹنگ کا اختتام وزیر اعظم کی ایک متاثر کن تقریر کے ساتھ ہوا۔

فڑنویس نے کہا کہ وزیر اعظم کا خطاب متاثر کن، سمت تلاش کرنے والا اور مستقبل کی راہ دکھاتا ہے۔ وزیر اعظم نے کہا کہ ہندوستان کی زندگی کا بہترین دور آنے والا ہے۔ ایسے میں ہمیں اس کی ترقی کے لئے خود کو وقف کرنا چاہیے۔ اپنی زندگی کے ہر لمحے کو ہندوستان کی ترقی کی کہانی میں لگائیں۔ اس امرت کال کو ’کرتویہ کال‘ میں تبدیل کرکے ہی ملک کو تیزی سے آگے بڑھایا جا سکتا ہے۔

فڑنویس نے کہا کہ وزیر اعظم نے بتایا کہ بی جے پی اب صرف ایک سیاسی تحریک نہیں ہے بلکہ سماجی و اقتصادی حالات کو بدلنے کی مہم ہے۔ وزیر اعظم نے ہمیں مشورہ دیا کہ پارٹی کے کچھ پروگرام خاص طور پر سرحدی دیہات میں منعقد کیے جائیں۔ تاکہ ہم ان سے مزید جڑیں اور ہمارے ترقیاتی منصوبے ان علاقوں تک پہنچ سکیں۔

فڑنویس نے بتایا کہ وزیر اعظم مودی نے میٹنگ کے دوران کہا کہ ہمیں سرحدی علاقوں کے دیہاتوں سے زیادہ سے زیادہ جوڑنا چاہئے اور انہیں مرکزی دھارے میں لانا چاہئے اور وہاں ہماری سرگرمیاں بڑھنی چاہئے۔