سیکورٹی کے وسیع انتظامات، اعلیٰ حکام نے سیکورٹی انتظامات کا جائزہ لیا

حیدرآباد، یکم جولائی (انڈیا نیرٹیو)

بی جے پی کی نیشنل ایگزیکٹو کی 2 جولائی سے شروع ہونے والی دو روزہ میٹنگ کے لیے سخت حفاظتی انتظامات کیے گئے ہیں۔ اس میٹنگ میں وزیر اعظم نریندر مودی بھی شرکت کر رہے ہیں۔ وہ دونوں دن حاضر رہیں گے۔ سائبرآباد کے پولیس کمشنر اسٹیفن رویندر نے ایچ آئی سی سی میں منعقد ہونے والی اس میٹنگ کے سلسلے میں سینئر پولیس افسران کے ساتھ سیکورٹی انتظامات کا جائزہ لیا۔

پولیس کمشنر اسٹیفن رویندرا نے بتایا کہ وسیع حفاظتی انتظامات کے تحت دہلی سے خصوصی طور پر آنے والے ایس پی جی اہلکاروں کے علاوہ پڑوسی اضلاع سے بلائے گئے پولیس اہلکاروں کا کثیر سطحی حفاظتی حصار ہوگا۔ حفاظتی انتظامات کے ساتھ ٹریفک کی روانی کو ہموار رکھنے کے لئے عہدیداروں کو ضروری ہدایات دی گئی ہیں۔ تمام پولیس اہلکار ٹیم اسپرٹ کے ساتھ کوآرڈینیشن کے ساتھ کام کر رہے ہیں۔ وزیراعظم کی آمد پر جلسے میں شرکت سے لے کر،جلسہ عام سے خطاب کرنے اور ان کی رہائش گاہ تک  سیکورٹی کے سخت انتظامات کیے جائیں گے۔

انہوں نے کہا کہ سیکورٹی سسٹم کے آپریشن کے لیے کمانڈ کنٹرول قائم کیا گیا ہے۔ اس کے ذریعے حفاظتی انتظامات کے حوالے سے ضروری ہدایات جاری کی جائیں گی۔ انہوں نے کہا کہ نیشنل ایگزیکٹیو کی تقریب اور جلسہ گاہ کی اینٹی سیبوٹاج ٹیم، بم ڈسپوزل اسکواڈ کی جانب سے  مکمل چھان بین کی جا رہی ہے۔

دوسری طرف ریاستی حکومت کے چیف سکریٹری سومیش کمار نے ریاستی سکریٹریٹ میں عہدیداروں سے میٹنگ کرکے وزیراعظم نریندر مودی کے دورہ حیدرآباد سے متعلق تیاریوں کا جائزہ لیا۔ انہوں نے بتایا کہ وزیر اعظم بی جے پی کی قومی ایگزیکٹیو میٹنگ میں شرکت کے لیے تین دن تک حیدرآباد میں رہیں گے۔ وزیر اعظم 2 جولائی کو حیدرآباد پہنچیں گے اور 4 جولائی کو روانہ ہوں گے۔ وزیر اعظم کے علاوہ بی جے پی کے زیر اقتدار ریاستوں کے مرکزی وزرا، وزرائے اعلیٰ اور نائب وزیر اعلیٰ اور پارٹی کے قومی سطح کے لیڈران بی جے پی کی قومی ایگزیکٹیو میٹنگ میں شرکت کریں گے۔

چیف سکریٹری نے افسران کو ہدایت دی  کہ وہ وزیر اعظم کے دورہ کو آسان بنانے کے لیے وسیع اورفول پروف  انتظامات کریں۔ وزیراعظم کے دورہ کے دوران ٹریفک کے ہموار انتظامات کرنے کی ہدایت کی گئی تاکہ عوام کو پریشانی کا سامنا نہ کرنا پڑے۔ انہوں نے جلسہ گاہ پر بیریکیڈنگ، لائٹنگ سمیت تمام انتظامات پر عمل کرنے کی ہدایت کی۔

ڈی جی پی ایم مہیندر ریڈی، چیف سکریٹری سنیل شرما، سول ایڈمنسٹریشن سکریٹری اروند کمار، ہوم پرنسپل سکریٹری روی، سکریٹری رضوی، حیدرآباد پولیس کمشنر، سائبرآباد پولس کمشنر اسٹیفن رویندرا، کمشنر لوکیش کمار، گورنر کے سکریٹری اور دیگر متعلقہ اعلیٰ عہدیداروں نے اس میٹنگ میں حصہ لیا۔