نئی دہلی، 03 اپریل (انڈیا نیرٹیو)

 کانگریس لیڈر راہل گاندھی آج سورت (گجرات) کی عدالت کے ذریعہ سنائی گئی دو سال کی سزا کو چیلنج کریں گے۔ وہ دوپہر کے بعد سورت سیشن کورٹ میں 2019 کے مجرمانہ ہتک عزت کیس میں اپنی سزا کے خلاف اپیل دائر کریں گے۔ اس دوران قومی راجدھانی میں راہل کے گھر ان سے ملنے ان کی ماں سونیا گاندھی پہنچیں۔

سورت میں پرینکا گاندھی واڈرا، کانگریس کی حکومت والی تین ریاستوں کے وزرائے اعلیٰ اور دیگر بڑے لیڈران کے علاوہ ریاستی یونٹ کے لیڈروں کے موجود ہونے کا امکان ہے۔

راہل کے وکلا  نے کہا کہ سورت کی سیشن عدالت سے سزا کو معطل کرنے کی درخواست کی جائے گی۔ توقع ہے کہ راہل تقریباً دو بجے تک سورت پہنچ جائیں گے۔

قابل ذکر ہے کہ 23مارچ کو سورت کے چیف جوڈیشل مجسٹریٹ ایچ ایچ ورما کی عدالت نے ایک تبصرہ کے سلسلے میں دائر مجرمانہ ہتک عزت کے معاملے میں راہل گاندھی کو قصوروار ٹھہرایا اور انہیں دو سال قید کی سزا سنائی۔

عدالت نے راہل کو تعزیرات ہند کی دفعہ 499 (ہتک عزت) اور 500 (کسی شخص کی مجرمانہ ہتک عزت کے مجرم کی سزا) کے تحت مجرم قرار دیا۔

تاہم، عدالت نے اسی دن کانگریس لیڈر کو ضمانت دے دی تھی اور سزا پر عمل درآمد پر 30 دن کے لیے روک لگا دی تھی تاکہ وہ اعلیٰ عدالت میں اپیل دائر کر سکیں۔ اس کے بعد لوک سبھا سکریٹریٹ نے 24 مارچ کو ایک نوٹیفکیشن جاری کرتے ہوئے راہل گاندھی کو پارلیمنٹ کی رکنیت سے نااہل قرار دے دیاتھا۔