پلوامہ میں پاکستانی دہشت پسند سمیت تین دہشت پسند مارے گئے
سری نگر، 05جنوری(انڈیا نیرٹیو)
وادی کشمیر میں فورسز اور دہشت پسندوں کے درمیان ہونے والی گولی باری کا نہ تھمنے والا سلسلہ جاری ہے۔جس کے دوران بدھ کو پلوامہ کے علاقے چانگام میں دہشت پسندوں اور سیکورٹی فورسز کے درمیان تصادم شروع ہونے کے بعد جیش محمد تنظیم سے تعلق رکھنے والے پاکستانی دہشت پسند سمیت تین دہشت پسند مارے گئے۔ کشمیر پولیس زون کے آفیشل ٹویٹر ہینڈل نے آئی جی پی کشمیر وجے کمار کا حوالہ دیتے ہوئے لکھا، دہشت پسند تنظیم جیش محمد کے 03 دہشت پسند بشمول ایک پاکستانی دہشت پسند مارا گیا۔
جب کہ ان کے قبضہ سے مجرمانہ مواد، اسلحہ اور گولہ بارود بشمول 2 ایم-4 کاربائن اور 1 اے کے سیریز کی رائفل برآمد ہوئی۔ آئی جی پی کشمیر نے اسے فورسز کیلئے بہت بڑی کامیابی بتا یا ہے۔ قبل ازیں پولیس اور فوج کی ایک مشترکہ ٹیم نے پولیس کے ذریعہ تیار کردہ ایک مخصوص ان پٹ پر چندگام میں محاصرے اور تلاشی کی کارروائی شروع کی۔
جب فورسز کی مشترکہ ٹیم نے ہدف بنائے گئے مقام کی تلاشی تیز کی تو چھپے ہوئے دہشت پسندوں نے تلاشی پارٹی پر فائرنگ کی جس سے انکاؤنٹر شروع ہوگیا۔جس کے دوران جوابی کارروائی میں تین دہشت پسند مارے گئے ہیں۔ واضح رہے کہ منگل کے روز کولگام گن فائٹ میں دو مقامی ٹی آر ایف دہشت پسند مارے گئے تھے۔
یہ پانچ دنوں میں سال 2022 شروع ہونے والا پانچواں انکاؤنٹر ہے اور فورسز نے تین پاکستانی دہشت پسندوں سمیت آٹھ دہشت پسندوں کو پانچ دنوں میں ہلاک کیا ہے،جبکہ ان کے قبضے سے کافی تعداد میں گولہ بارود بشمول M4کارباین بندوقیں بھی برآمد کی ہیں، جو کہ جدید ترین ہتھیار مانا جاتا ہے، اور اس ہتھیار کو زیادہ تر جیش محمد تنظیم کے دہشت پسند استعمال کرتے ہیں۔
