نئی دہلی، 15 اگست (انڈیا نیرٹیو)

کانگریس کی صدر سونیا گاندھی نے پیر کو کہا کہ ”اپنے آپ میں مگن“ مرکزی حکومت ملک کے آزادی پسندوں کی عظیم قربانیوں اور شاندار کارناموں کو معمولی ثابت کرنے پر تلی ہوئی ہے۔ انڈین نیشنل کانگریس عظیم قومی لیڈروں کو جھوٹ کی بنیاد پر کٹہرے میں کھڑا کرنے کی ہر کوشش کی سختی سے مخالفت کرے گی۔

یوم آزادی کے موقع پر کانگریس صدر سونیا گاندھی نے اپنے پیغام میں کہا کہ سیاسی فائدے کے لیے تاریخی حقائق پر جھوٹ اور غلط بیانی کی بنیاد پر گاندھی-نہرو-پٹیل-آزاد جیسے عظیم قومی لیڈروں کو کٹہرے میں کھڑا کرنے کی کوشش کی جا رہی ہے۔ ان کی پارٹی ایسی ہر کوشش کی مخالفت کرے گی۔

قابل ذکر ہے کہ سونیا گاندھی کووڈ-19 سے متاثر ہیں۔ اسی وجہ سے وہ آج پارٹی ہیڈکوارٹر میں منعقدہ پرچم کشائی کی تقریب میں شریک نہیں ہوسکیں۔ پارٹی کے سینئر لیڈر اور سابق مرکزی وزیر امبیکا سونی نے پرچم کشائی کی۔ جس میں پارٹی کے سینئر کارکنوں نے شرکت کی۔ کانگریس کے سابق صدر راہل گاندھی، کانگریس لیڈر غلام نبی آزاد اور آنند شرما اس دوران ایک ساتھ کھڑے نظر آئے۔

سونیا گاندھی نے یوم آزادی کی مبارکباد دیتے ہوئے ہندوستان کے روشن جمہوری مستقبل کی خواہش کا اظہار کیا۔ انہوں نے کہا کہ گزشتہ 75 سالوں میں ہندوستان نے اپنے باصلاحیت ہندوستانیوں کی محنت سے سائنس، تعلیم، صحت اور انفارمیشن ٹیکنالوجی سمیت تمام شعبوں میں بین الاقوامی میدان میں نا قابل فراموش نقوش چھوڑے ہیں۔ ایک طرف ہندوستان نے اپنے دور اندیش لیڈروں کی قیادت میں آزادانہ، منصفانہ اور شفاف انتخابی نظام قائم کیا۔  وہیں جمہوریت اور آئینی ادارے مضبوط بنایا۔

انہوں نے مزید کہا ہے کہ ہندوستان نے زبان، مذہب اور فرقہ کی تکثیری کسوٹی پرکھرا اترنے والے ایک سرکردہ ملک کے طور پر اپنی قابل فخر شناخت قائم کی ہے۔