سپریم کورٹ اور مختلف ہائی کورٹس میں پریکٹس کرنے والے تین سو سے زائد وکلا نے مرکزی وزیر قانون کرن رججو کے اس بیان پر تنقید کرتے ہوئے ایک بیان جاری کیا ہے کہ کچھ ریٹائرڈ جج بھارت مخالف گروہوں میں شامل ہیں۔ بیان میں کہا گیا ہے کہ مرکزی وزیر قانون کو سمجھنا چاہئے کہ حکومت پر تنقید کرنا کسی بھی طرح سے ملک دشمن اور ہندوستان مخالف نہیں ہے۔

بیان میں کہا گیا ہے کہ مرکزی وزیر قانون کا یہ بیان ریٹائرڈ ججوں کے لیے دھمکی آمیز بیان ہے اور عام لوگوں کے لیے یہ پیغام ہے کہ اختلاف رائے کی آواز کو نہیں بخشا جائے گا۔ بیان میں ان وکلاء نے کہا ہے کہ حکومت پر تنقید کرنے والے اتنے ہی محب وطن ہیں جتنے حکومت میں بیٹھے لوگ۔ جو لوگ حکومت کی کوتاہیاں گن رہے ہیں وہ اپنا بنیادی حق استعمال کر رہے ہیں۔

وکلا کے بیان میں کہا گیا ہے کہ مرکزی وزیر قانون کا یہ بیان ان کے عہدہ کے مطابق نہیں ہے۔ بیان میں، لوک سبھا میں صدر دروپدی مرمو کے خطاب پر شکریہ کی تحریک پر بات کرتے ہوئے ، وزیر اعظم نریندر مودی کو اس بیان کی یاد دلائی گئی کہ حکومتوں پر سخت سوالات اٹھائے جائیں۔ یہ سوالات حکومت کو محتاط اور جوابدہ بناتے ہیں۔