<h3 style="text-align: center;">تمل ناڈومیں نوار طوفان سے تین افراد کی موت</h3>
<p style="text-align: right;">چنئی ، 26 نومبر (انڈیا نیرٹیو)</p>
<p style="text-align: right;"> جمعرات کے اوائل میں طاقتور طوفان ’<a href="https://urdu.indianarrative.com/india/cyclone-nivar-weakened-after-hitting-the-coast-16796.html"> نوار</a> ‘ پڈوچیری اور تمل ناڈو کے ساحل پر ٹکرایا اور اس نے دونوں ریاستوں کے متعدد افراد کو متاثر کیا۔ تامل ناڈو کی ایڈیشنل چیف سکریٹری اتولیہ مشرا کے مطابق ، ریاست میں طوفان کی وجہ سے تین افراد کی موت ہوگئی ہے ، جب کہ تین افراد زخمی ہوئے ہیں۔ 101 جھونپڑیوں کو نقصان پہنچا ہے اور 380 درخت گر چکے ہیں۔</p>
<p style="text-align: right;">دوسری طرف ، ماہی گیروں کو مشورہ دیا گیا ہے کہ وہ جنوبی ساحلی آندھرا پردیش اور شمالی ساحلی تمل ناڈوکے سمندر میں سفر نہ کریں۔ چنئی میں جمعہ تک ہلکی ہلکی بارش ہوسکتی ہے۔ ادھر ، چنئی ایئرپورٹ سے 14 گھنٹے کے بعد پروازیں چلنا شروع ہوگئیں۔ جمعرات کی سہ پہر سے ضلع وِلو پورم ، کڈلور ، ناگپٹنم ، تروورور ، تھنجاور اور پڈوکوٹائی اضلاع میں ریاستی نقل و حمل کی خدمات معطل کردی گئیں۔</p>
<p style="text-align: right;"> طوفان کی وجہ سے آج پڈوچیری اور اس کے مضافاتی علاقوں کو بھاری نقصان اٹھانا پڑا ہے۔ بہت سے درخت اکھڑ جانے سے بجلی کے کھمبے خراب ہوگئے اور کئی علاقوں میں پانی داخل ہوگیا ہے۔</p>
<p style="text-align: right;"><a href="https://urdu.indianarrative.com/india/cyclone-nivar-weakened-after-hitting-the-coast-16796.html">نوار طوفان</a> سے ہونے والے نقصان کا اندازہ کرنے کے لیے پڈوچیری کے وزیر اعلیٰ وی نارائناسامی نے آج مختلف علاقوں کا دورہ کیا۔ نیشنل ڈیزاسٹر ریسپانس فورس (این ڈی آر ایف) کے جوانوں نے کامراج نگر علاقے میں سڑکوں سے گرے ہوئے درختوں کو ہٹا دیا ہے</p>.
