تاو تے طوفان کی وجہ سے مہاراشٹرا میں 6 افراد ہلاک ، 9 زخمی ، 2542 مکانات منہدم ، 12500 افراد کو محفوظ مقامات پر منتقل کیا گیا 

وزیر اعلی ٰنے انتظامیہ کو امداد اور راحت کے کاموں میں تیزی لانے کی ہدایت دی

مہاراشٹر میں تاو تے طوفان کی وجہ سے 6 افراد ہلاک اور 9 افراد زخمی ہوگئے ہیں۔ ریاست میں طوفان کی وجہ سے 2542 مکانات منہدم ہو چکے ہیں اور 12 ہزار 500 افراد کو محفوظ مقامات پر منتقل کردیا گیا ہے۔ ریاست کے ڈیزاسٹر منیجمنٹ ٹیم نے پیر کے روز وزیر اعلیٰ ادھو ٹھاکرے کو یہ اطلاع دی۔ وزیراعلیٰ نے ساحلی اضلاع کے ڈیزاسٹر مینجمنٹ ٹیم اور ضلعی مجسٹریٹ کو امداد اور بچاو کے کاموں میں تیزی لانے کی ہدایت دی ہے۔

طوفان سے ہونے والے نقصان کے بارے میں معلومات کے لئے وزیر اعلی ادھاو ٹھاکرے نے پیر کو ڈیزاسٹر مینجمنٹ ڈپارٹمنٹ کا جائزہ اجلاس طلب کیا۔ اس اجلاس میں ڈیزاسٹر مینجمنٹ ڈپارٹمنٹ نے طوفان سے ہونے والے نقصان کے بارے میں وزیر اعلی کو ابتدائی معلومات فراہم کیں۔

 وزیراعلیٰ نے عہدیداروں کو ہدایت کی ہے کہ وہ طوفان سے ہونے والے نقصانات کی فوری طور پر رپورٹ پیش کریں۔ انہوں نے طوفان کی وجہ سے گرنے والے بجلی کے کھمبوں اور راستوں میں گرے ہوئے درختوں کو فوری طور پر ہٹانے کی بھی ہدایت دی ہے۔

معلومات کے مطابق ، طوفان کے باعث تھانہ میں 2 ، رائے گڑھ میں 3 اورسندھو درگ میں ایک شخص کی موت ہوگئی۔ اس موقع پر محکمہ موسمیات کے سائنس داں ڈاکٹر کرشنانند ہوسالے کر بھی موجود تھے۔