اتوار کو گوا لبریشن ڈے پروگرام سے خطاب کرتے ہوئے وزیر اعظم نریندر مودی نے کہا کہ گوا گڈ گورننس، سیاحت اور فی کس آمدنی سمیت تمام شعبوں میں ملک میں سرفہرست ہے۔

گوا لبریشن ڈے کی تقریب سے خطاب کرتے ہوئے وزیر اعظم نے کہا کہ گوا نے گزشتہ 60 سالوں میں ایک طویل سفر طے کیا ہے۔ وزیر اعظم نے انسداد کورونا ویکسینیشن اور آدھار رجسٹریشن کا حوالہ دیتے ہوئے ریاستی حکومت کی تعریف کی۔ انہوں نے کہا کہ جب ملک کی دیگر ریاستوں میں کسی بھی اسکیم کو لاگو کرنے کی منصوبہ بندی کی جارہی ہوتی ہے، تب تک گوا اسے ایک شکل دے چکاہوتا ہے۔ انہوں نے کہا کہ حکومت گوا کی ترقی کے لیے نئے قدم اٹھا رہی ہے۔

وہ ڈاکٹر شیاما پرساد مکھرجی اسٹیڈیم میں منعقدہ گوا لبریشن ڈے کی تقریب سے خطاب کررہے تھے۔ اپنے خطاب میں سابق وزیر اعلیٰ منوہر پاریکر کو یاد کرتے ہوئے انہوں نے کہا کہ جب میں ان کامیابیوں اور گوا کی نئی شناخت کو مضبوط ہوتے دیکھتا ہوں تو اپنے  ساتھی منوہر پاریکر یاد آتے ہیں۔ انہوں نے نہ صرف گوا کو ترقی کی نئی بلندیوں تک پہنچایا بلکہ گوا کی صلاحیت کو بھی وسعت دی۔

جلسہ عام سے خطاب کرتے ہوئے وزیر اعظم مودی نے کہا کہ گوا کے لوگ کتنے ایماندار ہیں، کتنے باصلاحیت اور محنتی ہیں، منوہر کے اندر گوا کا کردار نظرآتا تھا۔ ہم نے ان کی زندگی میں یہ دیکھا کہ کس طرح کوئی شخص اپنی آخری سانس تک اپنی ریاست اور اپنے لوگوں کے لیے وقف رہ سکتا ہے۔

اس سے پہلے وزیر اعظم مودی نے 'آپریشن وجے' کے آزادی پسندوں اور جنگجوؤں کو اعزاز سے نوازا۔ گوا کے وزیر اعلیٰ پرمود ساونت نے وزیر اعظم کو ایک 'میگھ دوت پوسٹ کارڈ' پیش کیا جس میں گوا کی آزادی کی جنگ کے دوران مختلف واقعات کی تصاویر کا کولیج دکھایا گیا ہے۔

پروگرام میں وزیر اعظم نے بہترین پنچایت، میونسپلٹی، سویم پورنا متروں اور سویم پورنا گوا پروگرام کے استفادہ کنندگان کو نوازا۔ اس دوران انہوں نے 650 کروڑ روپے سے زیادہ کے پروجیکٹوں کا افتتاح بھی کیا۔’پریشن وجے ' کے طورپر منعقد کی جاتی ہے، جسے ہندوستانی مسلح افواج نے گوا کو پرتگالی راج سے آزاد کرانے کے لیے شروع کیا تھا۔