پٹنہ ،یکم مئی (انڈیا نیرٹیو)

 جون کا مہینہ بہار میں سیاسی طور پر سرگرم رہے گا۔ 12 جون کو بہار میں حکمراں عظیم اتحاد پارٹی کی جانب سے ملک بھر سے اپوزیشن خیمہ کے رہنماؤں کا ایک اجتماع ہوگا۔ دوسری طرف بی جے پی بھی اس ماہ چار بڑی ریلیاں کرنے جا رہی ہے ، جس میں وزیر اعظم نریندر مودی کی بھی ایک ریلی میں شرکت متوقع ہے۔

بہار کے وزیر اعلی نتیش کمار کی قیادت میں شروع کی گئی اپوزیشن اتحاد کی مہم کے سلسلے میں 12 جون کو پٹنہ میں ملک کی تمام اپوزیشن جماعتوں کی میٹنگ ہونے جا رہی ہے۔ وزیراعلیٰ کے دفتر سے موصولہ اطلاع کے مطابق بنگال کی وزیر اعلیٰ ممتا بنرجی میٹنگ میں شرکت کے لیے 11 جون کو پٹنہ پہنچیں گی۔

دوسری جانب بی جے پی آئندہ لوک سبھا انتخابات کے حوالے سے ریاست میں چار بڑی ریلیاں کرے گی ، جن میں سے ایک میں پی ایم مودی شرکت کریں گے اور بقیہ ریلیوں میں مرکزی وزیر داخلہ امت شاہ سمیت کئی دوسرے بڑے لیڈر شریک ہوں گے۔ ان ریلیوں کے ذریعے بی جے پی عوام کے درمیان پی ایم مودی کے نو سالہ دور کا حساب دے گی اور عظیم اتحاد سمیت نتیش حکومت پر شدید حملہ کرے گی۔

ریاستی بی جے پی کے مطابق وزیر اعظم نریندر مودی جون کے تیسرے ہفتے میں بہار کا دورہ کریں گے اور پارٹی کی ایک ریلی سے خطاب کریں گے۔ ریلی کے وقت اور جگہ کا مزید فیصلہ کیا جائے گا۔ وزیر اعظم کے ساتھ پارٹی کے کئی اعلیٰ قومی لیڈر بھی بہار آئیں گے۔ بی جے پی اپنے 9 سال مکمل ہونے کے خاص موقع پر 30 جون تک ایک خصوصی پروگرام منعقد کر رہی ہے۔ اس سلسلے میں بہار میں بی جے پی کے اعلیٰ لیڈروں کا ایک اجتماع ہوگا۔