وزارت خارجہ نے کہا ہے کہ ہندوستان جنگ زدہ یوکرین کو انسانی امداد فراہم کرے گا۔ تاہم وزارت کی جانب سے ابھی تک تفصیلی معلومات نہیں دی گئی ہیں۔

وزارت خارجہ کے ترجمان ارندم باغچی نے پیر کے روز کہا کہ یوکرین کے سفیر نے ہندوستان سے یوکرین کو امداد فراہم کرنے کی اپیل کی ہے۔ اس کے جواب میں ہندوستان نے انہیں یقین دلایا ہے کہ ہندوستان یوکرین کو ادویات سمیت انسانی امداد فراہم کرے گا۔

قابل ذکر ہے کہ بھارت مسلسل دونوں فریقوں سے بات چیت کے ذریعے حل تلاش کرنے کے لیے کہہ رہا ہے۔ بھارت نے اقوام متحدہ میں روس کے خلاف دو قراردادوں میں ووٹنگ میں حصہ نہیں لیا۔ چین اور متحدہ عرب امارات کا بھی یہی حال رہا ہے۔ روس کے صدر پوتن کو فون کرکے ہندوستان نے تشدد فوری طور پر بند کرنے کی اپیل کی تھی۔ تاہم، ہندوستان کو یوکرین میں پھنسے ہوئے طلبا سمیت ہندوستانی شہریوں کے بارے میں گہری تشویش ہے۔

وزارت نے پیر کو یوکرین میں پھنسے طلبا  اور ہندوستانی شہریوں سے اپیل کی کہ وہ مغربی خطے کی سرحدوں پر جمع ہونے کے بجائے قریبی شہروں میں رہیں۔ ہندوستانی ٹیمیں وہاں تعینات ہیں اور آپ سے رابطہ کریں گی۔

وزارت خارجہ کے ترجمان ارندم باغچی نے پیر کو یوکرین سے ہندوستانیوں کے انخلا کے لیے چلائے جانے والے 'آپریشن گنگا' کے بارے میں معلومات  دی۔ باغچی نے کہا کہ پولینڈ اور رومانیہ کی سرحد پر بڑی تعداد میں لوگ جمع ہو رہے ہیں۔ وہاں کافی سردی ہے اور اس کی وجہ سے کئی مسائل کا سامنا کرنا پڑ رہا ہے۔ وہ طلبااور ہندوستانی شہریوں سے اپیل کرتے ہیں کہ وہ قریبی شہر میں ٹھہریں اور انتظار کریں۔ وزارت خارجہ کی ٹیمیں وہاں تعینات ہیں اور آپ سے رابطہ کریں گی۔

باغچی نے کہا کہ یوکرین میں ہندوستانی سفارت خانے کی طرف سے ایڈوائزری جاری ہونے کے بعد سے اب تک تقریباً 8000 شہری ملک چھوڑ چکے ہیں۔ حالات کافی پیچیدہ ہیں اور بھارت نے نازک حالات میں اپنے شہریوں کے انخلا کے عمل کو تیز کر دیا ہے۔ انہوں نے کہا کہ مالڈووا کے راستے یوکرینی سرحد سے نکلنے کا راستہ موجود ہے۔ وزارت خارجہ کی ٹیم آپ کی مدد کرے گی۔

انہوں نے بتایا کہ اب تک چھ پروازیں تقریباً 1400 ہندوستانی شہریوں کو لے کر یوکرین سے ہندوستان آئی ہیں۔ چار پروازیں بخاریسٹ (رومانیہ) سے اور دو بوڈاپیسٹ (ہنگری) سے آچکی ہیں۔ یوکرین کی سرحد سے متصل 4 ممالک میں خصوصی ایلچی تعینات کرنے کا فیصلہ کیا گیا ہے۔ مرکزی وزرا جیوترادتیہ سندھیا رومانیہ، کرن رجیجو جمہوریہ سلواکیہ، ہردیپ پوری ہنگری اور وی کے سنگھ پولینڈ جائیں گے۔