Urdu News

جانچ میں انکشاف،ملک میں پہلی مرتبہ سرحد پار سے ہوا ڈرون حملہ

سرحد پار سے ہوا ڈرون حملہ

این آئی اے اور این ایس جی کی جانچ میں دہشت گردانہ حملے کی سازش کا اشارہ

امبالہ، پٹھان کوٹ اور اونتی پورا ایئربیس کو ہائی الرٹ پر رکھا گیا، رات میں فضائیہ کی پٹرولنگ ٹیم نے بھی ڈرون سے دھماکہ خیزمواد گرتے دیکھا تھا

جموں،27جون(انڈیا نیرٹیو)

جموں ایئرپورٹ کے ٹیکنیکل ایئریا یعنی ایئرفورس اسٹیشن پر اتوار کی رات کو ہوئے دو دھماکوں میں ڈرون کا ہی استعمال کیا گیا ہے۔ ملک میں پہلی مرتبہ ہوئے ڈرون حملے کی تصدیق جموں وکشمیر کے دی جی پی دلباغ سنگھ نے کی ہے۔ سنگھ نے کہا ہے کہ اس حملے کی سازش سرحدکے پار سے رچی گئی لیکن اسے انجام سرحد کے اندر سے ہی دیا گیا۔ اس لئے ایئرفورس اسٹیشن پر این آئی اے اور این ایس جی کی ٹیم ٹیرر اینگل سے جانچ کررہی ہے۔

 یہ بھارت میں اپنی طرح کا پہلا ڈرون حملہ ہے جس کا ممکنہ ہدف احاطہ میں کھڑے طیارے تھے۔ اس کے بعد امبالہ، پٹھان کوٹ، اور اونتی پورہ ایئربیس کو بھی ہائی الرٹ پر رکھا گیا ہے۔واضح رہے کہ جموں ایئر فورس اسٹیشن کے ٹیکنیکل ایئریا میں گزشتہ رات پانچ منٹ کے وقفے کے اندر دو زوردار دھماکوں میں ایئر فورس کے دو اہلکار کے زخمی ہونے کی اطلاع موصول ہوئی ہے۔ دریں اثنا، ہائی سیکورٹی والے مقام پر دھماکوں کے بعد جموں ایئرفورس اسٹیشن اور دیگر اہم ترین تنصیبات کی سیکورٹی بڑھا دی گئی ہے۔

سرکاری ذرائع نے بتایا کہ پہلا دھماکہ ہفتہ اور اتوار کی درمیانی شب قریب ایک بجکر 45 منٹ پر ایک عمارت کی چھت پر ہوا جبکہ پانچ منٹ سے بھی کم وقت کے بعد ایک اور دھماکہ کھلے میدان میں ہوا۔ انہوں نے بتایا کہ دھماکوں سے ایک عمارت کو نقصان پہنچا اور ایئر فورس کے دو اہلکار زخمی ہو گئے۔ زخمی اہلکاروں کی شناخت ارونگ سنگھ اور ایس کے سنگھ کے طور پر ہوئی ہے۔

انڈین ایئر فورس نے اپنے آفیشل ٹویٹر ہینڈل پر کہا: 'جموں ایئر فورس اسٹیشن کے ٹیکنیکل ایئریا میں اتوار کی علی الصبح کم شدت والے دو دھماکے ہوئے۔ ایک دھماکے کی وجہ سے ایک عمارت کی چھت کو معمولی نقصان ہوا جب کہ دوسرا ایک کھلے میدان میں پھٹ گیا'۔ایک اور ٹویٹ میں کہا گیا: 'ساز و سامان کو کوئی نقصان نہیں پہنچا۔ تحقیقات میں سول ایجنسیوں کو بھی شامل کیا گیا ہے'۔ بتایا جا رہا ہے کہ یہ دھماکے ڈرونز کے استعمال سے کئے گئے ہیں۔ وزیر دفاع راجناتھ سنگھ نے معاملے پر فضائیہ کے نائب سربراہ ایئر مارشل ایچ ایس اروڑہ سے بات کی ہے۔ ایئر مارشل اروڑہ از خود جموں کا دورہ کر کے صورت حال کا جائزہ لیں گے۔

Recommended