<h3 style="text-align: center;">اتوار کو مادھو سنگھ سولنکی کی آخری رسوم ادا کی جائے گی</h3>
<p style="text-align: right;">گاندھی نگر / احمد آباد ، 09 جنوری (انڈیا نیرٹیو)</p>
<p style="text-align: right;"> کانگریس کے قد آور لیڈر اور سابق وزیر اعلی ٰگجرات ، مادھو سنگھ سولنکی کا ہفتہ کوگاندھی نگر میں 94 سال کی عمر میں انتقال ہوگیا۔ وہ نرسمہا راؤ حکومت میں وزیر خارجہ بھی رہے تھے۔ ان کی آخری رسومات اتوار کو پورے سرکاری اعزاز کے ساتھ ادا کی جائیں گی۔</p>

<h4 style="text-align: right;">چار بار گجرات کے وزیر اعلیٰ رہے</h4>
<p style="text-align: right;">گجرات کی سیاست میں ، انہوں نے کھتریوں ، ہریجنوں ، آدیواسیوں اور مسلمانوں کے لیے ایک نئی حکمت عملی تیار کی ، جسے کے ایچ اے ایم تھیوری کے نام سے جانا جاتا ہے۔</p>
<p style="text-align: right;"> 1980 کی دہائی میں ، سولنکی زبر دست اکثریت کے ساتھ اقتدار میں آئے، ان چاروں برادریوں کو ساتھ لے کر چلے۔ وہ چار بار گجرات کے وزیر اعلی ٰرہے۔</p>
<p style="text-align: right;"> سولنکی 30 جولائی 1927 کو پیدا ہوئے تھے۔ وہ گجرات کانگریس کے رہنما بھارت سنگھ سولنکی کے والد ہیں۔ گجرات میں سب سے زیادہ اسمبلی نشستیں جیتنے اور وزیر اعلیٰ بننے کا ریکارڈ ان کے پاس ہے۔ مادھو سنگھ سولنکی گجرات کے 7 ویں وزیر اعلیٰ تھے۔ انہوں نے اسمبلی انتخابات میں 182 میں سے 149 سیٹیں حاصل کیں۔</p>

<h4 style="text-align: right;">وزیر اعظم نے دکھ کا اظہار کیا</h4>
<p style="text-align: right;">وزیر اعظم نریندر مودی نے سابق وزیر اعلیٰ سولنکی کے انتقال پر غم کا اظہار کیا ہے۔ انہوں نے ٹویٹ کیا کہ مادھو سنگھ سولنکی ایک مضبوط رہنما تھے جنہوں نے کئی دہائیوں تک گجرات کی سیاست میں اہم کردار ادا کیا۔</p>
<p style="text-align: right;"> معاشرے کے لیے ان کی بھرپور خدمات کے سبب انہیں یاد کیا جائے گا۔ میں ان کے انتقال سے رنجیدہ ہوں۔ مودی نے ان کےبیٹے بھرت سولنکی سے بات کی اور دکھ کا اظہار کیا۔</p>
<p style="text-align: right;"> وزیر اعظم نے ٹویٹ کیا کہ سیاست کے علاوہ ، مادھو سنگھ نے تعلیم کو ترجیح دی۔ جب بھی میں اس سے ملنے یا بات کرنے جاتا ، ہم کتابوں پر گفتگو کرتے اور وہ مجھے ایک نئی کتاب کے بارے میں بتاتے۔ ہمیشہ ہمارے درمیان ہونے والی گفتگو یاد رہے گی۔</p>
<p style="text-align: right;"> وزیر اعلیٰ وجے روپانی نے سابق وزیر اعلی سولنکی کی موت پر گہرے رنج و غم کا اظہار کیا ہے اور انہیں خراج عقیدت پیش کیا ہے۔</p>

<h4 style="text-align: right;">ایک دن کاریاستی سوگ کا اعلان</h4>
<p style="text-align: right;">ریاست نے آنجہانی مادھو سنگھ سولنکی کے اعزاز میں ایک روزہ ریاستی سوگ کا اعلان کیا ہے۔ وزیر اعلیٰ نے آنجہانی مادھو سنگھ سولنکی کی آخری رسومات کو پورے سرکاری اعزاز کے ساتھ منظم کرنے کا فیصلہ کیا ہے۔ نیز ، روپانی نے آج ضلع مہیساگر میں اپنے پروگرام منسوخ کردیئے ہیں۔</p>
<p style="text-align: right;"> پچھلے سال ، سابق وزیر اعلیٰ سولنکی نے اپنی سالگرہ گاندھی نگر میں منائی۔ 2017 میں اپنے گجرات کے دورے کے دوران ، کانگریس لیڈر راہل گاندھی مادھو سنگھ سے ملنے گئے تھے۔</p>
<p style="text-align: right;"> مادھو سنگھ سولنکی 1976 میں گجرات کے وزیر اعلی ٰبنے تھے۔ پھر 1881 میں دوبارہ اقتدار میں آئے۔ انہوں نے معاشرتی اور معاشی طور پر پسماندہ طبقات کے لیے ریزرویشن متعارف کرایا ، پھر 1985 میں استعفیٰ دیا ، لیکن پھر انہوں نے اسمبلی کی 182 نشستوں میں سے 149 میں کامیابی حاصل کی۔</p>
<p style="text-align: right;"> آج تک کسی نے بھی یہ  ریکارڈ نہیں توڑا ہے۔ ملک بھر میں دوپہر کے کھانے کا آغاز سولنکی کی ہی دین ہے۔ ریاست بھر میں لڑکیوں کی مفت تعلیم بھی ان کے وقت میں شروع ہوئی۔</p>.