وزیر اعظم نریندر مودی کی قیادت میں ملک نے گذشتہ آٹھ سالوں میں کئی محاذوں پر ترقی کا پرچم لہرایاہے۔ 'میک ان انڈیا' مہم کے تحت مختلف شعبوں میں نئے نئے تجربات ہو رہے ہیں۔ ریلوے میں بھی میک ان انڈیا مہم کی کامیابی وندے بھارت ابھیان کی شکل میں صاف نظر آرہی ہے۔
کبھی اپنی لیٹ لطیفی کے لئے پہچانی جانے والی انڈین ریلویز اب مودی حکومت میں پٹریوں پررفتار سے دوڑ رہی ہے۔ اس نے وقت اور رفتار کے لحاظ سے بھی نئے معیارات قائم کیے ہیں۔ میک ان انڈیا کے تحت تیار کی گئی ملک کی سیمی ہائی اسپیڈ 'وندے بھارت ایکسپریس' (ٹرین -18) کو 15 فروری 2019 کو نئی دہلی- وارانسی کے درمیان جھنڈی دکھا کر روانہ کیا گیا۔ قوم کو دوسری وندے بھارت ٹرین کا تحفہ نئی دہلی-شری ماتا ویشنو دیوی کٹرا کی شکل میں 3 اکتوبر 2019 کو ملا۔ اس سے دہلی۔کاشی وشوناتھ اوردہلی۔ ویشنو دیوی کے درمیان یاتریوں کا راستہ آسان ہو گیا۔ اس وقت نئی دہلی-کٹرا اور نئی دہلی- وارانسی روٹ پر وندے بھارت ایکسپریس ٹرینوں کے صرف دو ریک چل رہے ہیں۔
وندے بھارت ایکسپریس کو زیادہ سے زیادہ 180 کلومیٹر فی گھنٹہ کی رفتار سے چلانے کے قابل بنایا گیا ہے، لیکن ٹریک کی موجودہ حالت کی وجہ سے ٹرین 130 کلومیٹر فی گھنٹہ کی زیادہ سے زیادہ رفتار سے چلتی ہے۔ وندے بھارت ٹرینیں مسافروں کے نقطہ نظر سے شتابدی ٹرینوں سے یقینی طور پرایک قدم آگے ہے۔ ٹرینوں کے ہر ڈبے میں دھول سے پاک ماحول کے لیے گینگ وے، ماڈیولر بائیو ویکیوم ٹوائلٹس، ایگزیکٹو کلاس میں روٹیٹنگ سیٹیں، پرسنلائزڈ ریڈنگ لائٹس، سلائیڈنگ فل اسٹیپس کے ساتھ آٹومیٹک انٹری/ایگزٹ دروازے، ڈفیوز ایل ای ڈی لائٹنگ، منی پینٹری، سینسر پر مبنی انٹر کنکٹنگ دروازے ہیں۔
مودی حکومت نے بجٹ 2022 میں اگلے تین سالوں میں 400 سیمی ہائی اسپیڈ اگلی نسل کی وندے بھارت ٹرینیں شروع کرنے کا منصوبہ بنایا ہے۔ یہ نئی نسل کی وندے بھارت ٹرینیں بہتر توانائی کی کارکردگی اور مسافروں کی سواری کا تجربہ فراہم کریں گی۔
ماہرین کاخیال ہے کہ وندے بھارت ایکسپریس کے ساتھ ہندوستان نقل و حرکت کے ایک نئے دور میں داخل ہو گیا ہے۔ ان کا کہنا ہے کہ اگر 400 کی تعداد کو حاصل کیا جاتا ہے، تو اس سے ریلوے کو مسافروں کی بہتر آمدنی ہونے میں مدد ملے گی اور 'میک ان انڈیا' بنانے والوں کو تقویت ملے گی۔ مسافروں کے نقطہ نظر سے، ان ٹرینوں کا مطلب یقینی طور پر ایک بہتر سفری تجربہ ہے۔ ماہرین کا کہنا ہے کہ اس تناظر میں ریلوے ایئر لائنس کی طرح پریمیم کرایہ وصول کر سکے گا۔
وزیر اعظم مودی نے گزشتہ سال یوم آزادی پر لال قلعہ کی فصیل سے اپنے خطاب میں آزادی کے امرت مہوتسو کے پیش نظر ملک کے سامنے کئی اہداف رکھے تھے۔ اسی سلسلے میں، انہوں نے ہندوستانی ریلوے کے لیے امرت فیسٹیول کے 75 ہفتوں میں یعنی 15 اگست 2023 تک ملک کے ہر کونے کو جوڑنے کے لیے 75 وندے بھارت ٹرینیں شروع کرنے کا ہدف مقرر کیا۔
