میٹنگ 2022 کے اوائل میں ہونے والے اسمبلی انتخابات کی تیاریوں کے پیش نظر ہوئی

نئی دہلی ، 26 جون (انڈیا نیرٹیو)

بھارتیہ جنتا پارٹی (بی جے پی) کے صدر جے پی نڈا نے پانچ ریاستوں میں آئندہ اسمبلی انتخابات کی تیاریوں کے پیش نظر مرکزی وزیر داخلہ امیت شاہ ، وزیر دفاع راجناتھ سنگھ اور متعدد وزراءاور پارٹی کے جنرل سکریٹریوں سے ایک ملاقات کی۔ اس میٹنگ میں حکومت اور تنظیم کے مابین رابطوں پر تبادلہ خیال کے ساتھ ساتھ اترپردیش ، اتراکھنڈ ، پنجاب ، منی پور اور گوا سمیت پانچ ریاستوں کے اسمبلی انتخابات کے لئے حکمت عملی تیار کی گئی ۔

ہفتہ کو بی جے پی ہیڈ کوارٹر میں منعقدہ اس میٹنگ کے دوران ، آئندہ اسمبلی انتخابات کے لیے ریاستوں میں کورونا ویکسی نیشن کی حیثیت ، مرکزی اسکیموں پر کام کرنے اور اس کے فوائد عام لوگوں تک پہنچنے کے بارے میں بھی تبادلہ خیال کیا گیا۔

ذرائع نے انکشاف کیا ہے کہ آئندہ اسمبلی انتخابات کی تیاریوں کے پیش نظر تنظیمی ذمہ داریوں کو نبھانے والے بہت سے رہنما بھی اس میں شامل تھے۔ اجلاس میں ، ریاستی حکمت عملی سے متعلق انتخابات کی تیاریوں کا جائزہ لینے کے ساتھ ساتھ ، آئندہ کی حکمت عملی پر غوروفکرکیا گیا۔ 

اجلاس میں مرکزی وزیر داخلہ امت شاہ اور وزیر دفاع راجناتھ سنگھ کے علاوہ وزیر خزانہ نرملا سیتارامن ، ٹیکسٹائل کے وزیر اسمرتی ایرانی ، کھیل اور نوجوانوں کے امور کے وزیر کیرن رججیجو اور اترپردیش سے وابستہ بی جے پی کے اعلی رہنما بھی اس میں شامل تھے۔

قابل ذکر ہے کہ سال 2022 میں کل سات ریاستوں میں اسمبلی انتخابات ہوں گے۔ سال کے آغاز میں اترپردیش ، اتراکھنڈ ، پنجاب ، منی پور اور گوا میں اسمبلی انتخابات ہوں گے ، جب کہ ہماچل پردیش اور گجرات میں سال کے آخر میں انتخابات ہوں گے۔