نئی دہلی 24 جولائی 2021: ثقافت اور پارلیمانی امور کے مرکزی وزیر جناب ارجن رام میگھوال نے ’’آزادی کی شوریہ گاتھا‘‘ نام سے ایک نمائش کا افتتاح کیا جس میں امر شہید چندر شیکھر آزاد کی زندگی کی عکاسی کی گئی ہے۔ نئی دہلی میں اندراگاندھی نیشنل سنٹر فار دا آرٹس میں کل اس نمائش کا افتتاح کیا گیا جو ’’آزادی کا امرت مہوتسو ‘‘کا حصہ ہے۔
اس کے دوران IGNCA کی جانب سے تین روزہ ’’ کلا کوش پرتشٹھا دیوس‘‘کے تیسرے دن کتابوں اور ڈاکو مینٹریز کا بھی اجراء کیا گیا۔ پروگرام کی صدارت جناب رام بہادر رائے، چیئرمین IGNCA ٹرسٹ نے کی۔ اس موقع پر سمپورنانند سنسکرت یونیورسٹی وارانسی کے وائس چانسلر پروفیسر ہرے رام ترپاٹھی، IGNCA کے رکن سکریٹری ڈاکٹر سچیدانند جوشی، کلاکوش شعبے کی صدر ڈاکٹر سشما جاٹو اور دیگر مہمان موجود تھے۔
ثقافت کے وزیر مملکت نے اس موقع پر کہا کہ ’’آزادی کا امرت مہوتسو‘‘ کے ذریعہ ملک کی نوجوان نسل یہ جانے گی کہ جدوجہد آزادی کے دوران کتنے لوگ شہید ہوئے تھے۔ جدوجہد آزادی کے دوران غریب طبقے کے بہت سے لوگوں نے اپنے روزگار کھودیئے تھے جن کو تاریخ میں کبھی جگہ نہیں ملی وزیر اعظم ہی تھے جنھوں نے آزادی ک 75 ویں سالگرہ منانے کے لئے’’ آزادی کا امرت مہوتسو‘‘کا نام دیا۔ وزیر اعظم نے تمام وزارتوں/محکموں کو ہدایت دی ہے کہ آزادی کے 75 برس مکمل ہونے پر ملک بھر میں اپنے طور پر بھی پروگراموں کا اہتمام کریں۔
جناب رام بہادر رائے نے اپنی تقریر میں کہا کہ اگر چہ ہندوستان 1947 میں آزاد ہوا تھا لیکن 1857 میں ہی جدوجہد آزادی کا بیج بودیا گیا تھا۔ لہذا یہ دونوں سال اور ان کا درمیانی وقت آزادی کا امرت مہوتسو کے لئے بہت اہم ہے۔
اس موقع پر ڈاکٹر سچیدانند جوشی نے کہا کہ ثقافت کی وزارت آزادی کا امرت مہوتسو منانے کے لئے بہت سے پروگراموں کا اہتمام کررہی ہے اور اسی سلسلے کے حصے کے طور پر آزادی کی شوریہ گاتھا کا اہتمام کیا گیا ہے۔
ڈاکٹر جوشی نے کہا کہ یہ اتفاق ہے کہ آج کا دن گوروپورنیما ہے اور اسی دن کلا کوش شعبے کا سالانہ فیسٹول ہوتا ہے۔ انھوں نے کہا کہ اس بات کی کوشش کی جارہی ہے کہ ’’کلا تتوکوش‘‘، ’’کلا مول شاستر‘‘ اور کلا سمایوجنا کے تحت ضروری اور معتبر متن تیار کیا جائے جو آسان زبان میں ہوا اور اسکالروں کے لئے دستیاب ہو۔ اس کے لئے ہم نئے پروجیکٹوں کی ایک نئی سیریز شاستر امرتم کے نام سے آج شروع کررہے ہیں جس کے تحت ہم اپنی ادبی تصانیف کو آسان پیرائے میں پیش کریں گے۔ابتدائی مرحلے میں ہم دس تصانیف پر کام کریں گے اور اگلے ایک برس کے اندر بارہ آسان متن والی کتابیں لائیں گے۔ متن کو مختصر اور آسان پیرائے میں لانے سے یہ نوجوان اسکالروں اور تحقیق کاروں کے لئے بہت سود مند ثابت ہوں گی۔
