نئی دہلی، 15 اگست (انڈیا نیرٹیو)

نئے ترقی یافتہ، خوشحال، خود انحصار اور جامع ہندوستان کی تعمیر میں ہم وطنوں سے تعاون کی اپیل کرتے ہوئے وزیر اعظم نریندر مودی نے کہا کہ یہ مقصد سب کا ساتھ، سب کا وکاس، سب کا وشواس اور سب کی کوششوں سے حاصل کیا جانا ہے۔

 پڑوسی ممالک سے دہشت گردی اور توسیع پسندی کے چیلنجوں کا حوالہ دیتے ہوئے، وزیر اعظم مودی نے اتوار کو ملک کے 75 ویں یوم آزادی کے موقع پر لال قلعے کی فصیل سے اپنے خطاب میں کہا کہ ملک ان سے بہادری سے لڑ رہا ہے اور ان کو جواب دے رہا ہے۔اپنی تقریر میں انہوں نے اجودھیا میں رام کے مندر کی تعمیر اور جموں و کشمیر سے آرٹیکل 370 کے خاتمے کی راہ ہموار کرنے کا بھی ذکر کیا۔ وزیراعظم نے کئی اہم اعلانات بھی کیے جن میں سینک سکولوں میں لڑکیوں کو داخلہ دینا، ملک کو توانائی کے شعبے میں خود انحصار بنانے کے لیے قومی ہائیڈروجن مشن کا قیام، 75 وندے بھارت ایکسپریس ٹرینیں شروع کرنا شامل ہیں۔

سہولیات تک رسائینہیں بلکہ تکمیل کومقصد قرار دیتے ہوئے وزیر اعظم نے کہا کہ اب تک ملک کی حکومتوں کی کوشش تھی کہ ملک کے کونے کونے تک پہنچیں، لیکن اب مقصد یہ ہونا چاہیے کہ تمام سہولیات سو فیصد لوگوں تک پہنچ جائیں۔ انہوں نے کہا کہ اب ہمیں ترقی کی طرف نہیں بلکہ تکمیل کی طرف جانا ہے یعنی تمام سہولیات ملک کے سو فیصد لوگوں کو فراہم کی جانی چاہئیں، یہ ہمارا ہدف ہونا چاہیے۔ تمام خاندانوں کو تمام سہولیات ملنی چاہئیں اور ہمیں تمام اسکیموں کو پورا کرنے کا ہدف حاصل کرنا ہے۔ اس کے لیے زیادہ وقت نہیں لگناہے۔

شہروں اور دیہاتوں کے درمیان فاصلے کو ختم کرنے پر زور دیتے ہوئے، انہوں نے کہا کہ آپٹیکل فائبر نیٹ ورک اب وہاں پہنچ رہا ہے تاکہ شہروں اور دیہاتوں کے درمیان فرق کو ختم کیا جا سکے۔ انہوں نے کہا کہ گاؤں میں کئی جگہوں پر خواتین سیلف ہیلپ گروپس میں شامل ہو رہی ہیں اور نئے منصوبے شروع کر رہی ہیں، ایسی خواتین کے لیے حکومت ای کامرس پلیٹ فارم بنائے گی تاکہ ان کی مصنوعات ملک کے کونے کونے تک پہنچ سکیں۔ انہوں نے کہا کہ حکومت غریب اور پسماندہ افراد کے لیے ریزرویشن سسٹم کو یقینی بنانے کے لیے کام کر رہی ہے اور ریاستوں کو بل پاس کر کے محروم طبقات کی شناخت کی ذمہ داری دی گئی ہے۔

وزیراعظم نے کہا کہ ان کی حکومت گزشتہ کئی دہائیوں سے حل طلب مسائل کے حل کے لیے بھی کام کر رہی ہے۔ حکومت اپنی ذمہ داری سے پوری طرح آگاہ ہے اور ملک کی حفاظت کرنے والے محافظوں کو بھی چوکس رہنے کی ضرورت ہے۔ انہوں نے کہا کہ حکومت ملکی دفاع میں مصروف افواجکے ہاتھ مضبوط کرنے میں کوئی کسر نہیں چھوڑ رہی ہے۔ دفاعی شعبے میں ہندوستانی کمپنیوں اور کاروباری افراد کو مواقع دینے کے لیے ملک میں کوششیں جاری ہیں۔

اس دوران وزیراعظم نے اپنی حکومت کی سخت اور موثر کوششوں کا ذکر کیا۔ انہوں نے کہا کہ 21 ویں صدی کا ہندوستان بڑے اہداف بنانے اور ان کو حاصل کرنے کی صلاحیت رکھتا ہے۔ آج ہندوستان ان موضوعات کو بھی حل کر رہا ہے جن کے حل کے لیے صدیوں تک انتظار کرنا پڑا۔ انہوں نے کہا کہ آرٹیکل 370 کو تبدیل کرنے کا تاریخی فیصلہ، ملک کو ٹیکس کے جال سے آزاد کرنے کے لیے سامان اور خدمات ٹیکس (جی ایس ٹی) کا نیا نظام، ملک کے جوانوں کو ون رینک ون پنشن، رام جنم بھومی کیس کا پرامن حل پچھلے کچھ دنوں میں ملک نے سچ ہوتے ہوئے دیکھا ہے۔

وزیر اعظم نے کہا کہ ملک کے 80 فیصد سے زیادہ کسان وہ ہیں جن کے پاس 2 ہیکٹر سے کم زمین ہے۔ ملک میں پہلے بنائی گئی پالیسیوں میں ان چھوٹے کسانوں پر مطلوبہ توجہ نہیں دی گئی۔ اب ان چھوٹے کسانوں کو ذہن میں رکھتے ہوئے فیصلے کیے جا رہے ہیں۔ انہیں سستا سامان ملے، آسان قرض اور فصلوں پر انشورنس حاصل کرنے پر زور دیا جا رہا ہے۔

وزیر اعظم نے ملک کے تمام سینک سکولوں کے دروازے لڑکیوں کے لیے کھولنے کا اعلان کیا۔ اس وقت ملک میں 33 سینک سکول چل رہے ہیں۔ وزیر اعظم نے کہا کہ انہیں لاکھوں بیٹیوں کی طرف سے پیغام ملتا تھا کہ وہ بھی سینک سکول میں پڑھنا چاہتی ہیں۔ سینک سکولوں کے دروازے ان کے لیے بھی کھولے جائیں۔ انہوں نے کہا کہ ڈھائی سال قبل میزورم میں اس سمت میں کوششیں کی گئی تھیں۔ میزورم کے سینک سکول میں بیٹیوں کو داخل کرنے کا تجربہ پہلی بار کیا گیا۔