ایس جے شنکر اور طالبان رہنماوں کی ملاقات کی خبریں بے بنیاد ہیں

نئی دہلی ، 30جون (انڈیا نیرٹیو)

سوشل میڈیا پر گردش کر رہی طالبان رہنماؤں اور وزیر خارجہ ایس جے شنکر کی ملاقات سے متعلق خبریں غلط ، بے بنیاد اور شرارت پر مبنی ہیں۔وزارت خارجہ سے وابستہ ذرائع کے مطابق وزیر خارجہ ایس جے شنکر کے طالبان نمائندوں سے ملاقات کے بارے میں سوشل میڈیا پر گردش کرنے والی خبریں سراسر غلط ، بے بنیاد اور شرارت پر مبنی ہیں۔

قابل ذکر ہے کہ افغانستان کے صحافیوں نے میڈیا ذرائع کے حوالے سے دعوی کیا تھا کہ ایس جے شنکر نے اہم طالبان رہنماؤں ملا برادر،خیر اللہ اور شیخ دلاور سے ملاقات کی ہے۔طالبان رہنماوں کی جانب سے مبینہ طور پر کہا گیتا تھا کہ انہوں نے ہندوستانی وزیر خارجہ کو بتایا کہ طالبان اور بھارت کے درمیان تعلقات پاکستان کے موقف پر مبنی نہیں ہوں گے۔

وزارت خارجہ کے ترجمان اریندم باغچی سے حال ہی میں ہندوستان – طالبان کے درمیان رابطوں اور بات چیت کے بارے میں پوچھا گیا تھا۔ اس سلسلے میں ، انہوں نے صرف اتنا کہا کہ ہندوستان افغانستان سے متعلق مختلف اسٹیک ہولڈرس کے ساتھ رابطے میں ہے۔

وزیر خارجہ ایس جے شنکر نے گذشتہ ہفتے اپنے غیر ملکی دورے کے دوران دو بار خلیجی ملک قطر کے رہنماؤں سے بات چیت کی تھی۔انہوں نے قطر کے وزیر خارجہ اور قومی سلامتی کے مشیر سے ملاقات کی تھی۔ سفارتی حلقوں میں یہ موضوع بحث رہاہے کہ قطر بھارت اور طالبان کے مابین رابطے کا ایک ذریعہ بن رہا ہے۔