دہلی۔این سی آر میں ہری سبزیوں کی قیمتوں میں 10 فیصد تک اضافہ

پیاز، ٹماٹر اور ہری سبزیوں کی افراط زر نے ان لوگوں کی زندگی مشکل بنا دی ہے جو پیٹرول ڈیزل اور سرسوں کے تیل کی بڑھتی ہوئی قیمتوں سے دوچار ہیں۔ سبزیوں کی بڑھتی ہوئی قیمتوں نے عام آدمی کا کچن کا بجٹ خراب کر دیا ہے۔ سبزیوں کی قیمتوں میں اضافے کی بنیادی وجہ غیر موسمی بارش اور ڈیزل کی قیمت میں مسلسل اضافہ ہے۔

دہلی-این سی آر میں سبزیوں کی قیمتیں آسمان کو چھو رہی ہیں۔ جہاں پیاز خوردہ میں 50-60 روپے فی کلو فروخت ہو رہا ہے، ٹماٹر بھی 60 روپے فی کلو مل رہا ہے، جب کہ ہری سبزیوں کی قیمت میں 10 فیصد اضافہ ہوا ہے۔ دہلی کے خوردہ سبزی فروشوں نے ہفتے کے روز ایک انٹرویو میں کہا کہ موسمی سبزیاں آنے میں تقریبا پندرہ دن لگیں گے۔

دارالحکومت دہلی سے متصل غازی آباد میں بھی سبزیوں کی قیمتوں میں اضافہ دیکھا جا رہا ہے۔ ایک گھریلو خاتون نے بتایا کہ ہری سبزیوں کی قیمت میں 10 فیصد اضافہ ہوا ہے۔ یہ اضافہ ہماری جیبوں پربھاری پڑ رہا ہے۔ ایسی صورت حال میں گھر چلانا مشکل ہوتا جا رہا ہے اور پورے کچن کا بجٹ خراب ہو گیا ہے۔ ایک سبزی فروش نے کہا کہ ڈیزل اور پیٹرول کی قیمتوں میں اضافہ کی وجہ سے، مال کی ڈھلائی کے کرایہ میں اضافہ ہوا ہے جو سبزیوں کی قیمتوں کو متاثر کر رہا ہے۔