نئی دہلی، 10 نومبر (انڈیا نیریٹو)

صدر دروپدی مرمو جمعرات سے ا ڈیشہ کے دو روزہ دورے پر ہیں۔ صدر کے طور پر یہ ان کا ا ڈیشہ کا پہلا دورہ ہوگا۔

راشٹرپتی بھون نے بدھ کو ایک سرکاری بیان میں کہا کہ صدر دروپدی مرمو 10 اور 11 نومبر کو اُڈیشہ کا دورہ کریں گی۔

صدر 10 نومبر کو پوری کے شری جگن ناتھ مندر میں بھگوان جگن ناتھ کی پوجا کے ساتھ اپنے دورے کا آغاز کریں گی۔ اس کے بعد وہ بھونیشور پہنچیں گی جہاں وہ ممتاز مجاہد آزادی اور قائدین کے مجسموں کے سامنے گلہائے عقیدت پیش کریں گی۔ اسی شام صدر جمہوریہ بھونیشور کے راج بھون میں ان کے اعزاز میں منعقد ہونے والے ایک شہری استقبالیہ میں شرکت کریں گی۔

بیان میں کہا گیا ہے کہ 11 نومبر کو صدر جمہوریہ بھونیشور میں تپوبن ہائی اسکول، گورنمنٹ گرلز ہائی اسکول یونٹ-2 اور کنتلا کماری سبت آدیواسی گرلز ہاسٹل یونٹ-2 کا دورہ کریں گی اور طلباء اور اساتذہ سے بات چیت کریں گی۔ اسی دن وہ بھونیشور کے جے دیو بھون سے مرکزی وزارت تعلیم کے مختلف پروجیکٹوں کا آغاز کریں گی۔