صدر جمہوریہ ہند جناب رام ناتھ کووند نے آج (13 جولائی 2022) کو ایک ویڈیو پیغام کے ذریعے سارناتھ واقع اتر پردیش میں یومِ دھمّا ککّا 2022 کی تقریبات سے خطاب کیا۔

اجتماع سے خطاب کرتے ہوئے صدر جمہوریہ نے کہا کہ بُدھ مت ہندوستان کی عظیم روحانی روایات میں سے ایک رہا ہے۔ بھگوان بُدھ کی زندگی اور تعلیمات سے وابستہ بہت سے مقدس مقامات ہندوستان میں واقع ہیں۔ ان بہت سے مقامات میں چار اہم مقامات ہیں۔ پہلا بودھ گیا ہے، جہاں انہوں نے نروان حاصل کیا۔ دوسرا سارناتھ، جہاں انہوں نے اپنا پہلا خطبہ پیش کیا۔ تیسری جگہ شراوستی ہے جہاں انہوں نے زیادہ تر چارماہ گزارے اور زیادہ تر خطبات پیش کئے اور چوتھا مقام کُشی نگر ہے جہاں انہوں نے مہاپری نروان حاصل کیا۔ انہوں نے کہا کہ بھگوان بدھ کے مہاپری نروان کے بعد ان کی تعلیمات سے وابستہ کئی خانقاہیں، زیارت گاہیں،یونیورسٹیاں قائم ہوئیں جو علم کے مراکز رہی ہیں۔

آج یہ تمام مقامات بدھ سرکٹ کا حصہ ہیں جو ہندوستان اور بیرون ملک سے زائرین اور مذہبی سیاحوں کے لئے موجبِ کشش ہیں۔

صدر جمہوریہ نے کہا کہ ہماری جمہوریت بُدھ مت کے نظریات اور علامات سے بہت متاثر ہوئی۔ قومی نشان سارناتھ کے اشوک ستون سے لیا گیا ہے جس پر دھرم چکر بھی کندہ ہے۔ لوک سبھا کے اسپیکر کی کرسی کے پیچھے،سترا "دھرم چکر پرورتنایا" کندہ ہے۔ ہمارے آئین سازِ اعلیٰ باباصاحب ڈاکٹر بھیم راؤ امبیڈکر نے کہا تھا کہ ہماری پارلیمانی جمہوریت میں قدیم بدھ مت کی وابستگیوں کے بہت سے عمل کو اپنایا گیا ہے۔

صدر جمہوریہ نے کہا کہ بھگوان بُدھ کے مطابق امن سے بڑی کوئی خوشی نہیں ہوتی۔بھگوان بدھ کی تعلیمات میں داخلی سکون پر زور دیا گیا ہے۔ صدر جمہوریہ نے کہا کہ اس موقع پر ان تعلیمات کو یاد کرنے کا مقصد یہ ہے کہ تمام لوگ بھگوان بدھ کی تعلیمات کا صحیح مفہوم سمجھیں اور تمام برائیوں اور عدم مساوات کو دور کر کے دنیا کو امن اور ہمدردی سے مالا مال کریں۔

وزارت ثقافت بین الاقوامی بدھسٹ کنفیڈریشن کے ساتھ مل کر آزادی کے امرت مہوتسو کے حصے کے طور پر آشادہ پورنما دیوس منا رہی ہے۔