Urdu News

بھنڈراوالا کے آبائی گاؤں روڈے سے خالصتانی حامی امرتپال گرفتار

خالصتانی حامی امرتپال

پنجاب آکر اسی گاؤں سے شروع کی تھی بنیاد پرست مہم

36 دن سے پولیس کو دے رہا تھا چکمہ

چنڈی گڑھ، 23 اپریل(انڈیا نیرٹیو)

 پنجاب پولیس نے کاؤنٹر انٹیلی جنس کے ساتھ مل کر ایک مشترکہ آپریشن کرتے ہوئے خالصتانی امرت پال کو گرفتار کر لیا ہے۔ پولیس نے امرت پال کی گرفتاری کا باضابطہ اعلان نہیں کیا ہے۔ امرت پال گزشتہ 36 دنوں سے پولیس کو چکمہ دے رہا تھا۔

پنجاب پولیس نے پنجاب میں خالصتانی سرگرمیاں چلانے کے الزام میں 18 مارچ کو آپریشن شروع کیا تھا۔ امرت پال جب دبئی سے پنجاب آیا تو روڈے گاؤں میں ہی اس کی دستار بندی کی گئی تھی۔ روڈے گاؤں جرنیل سنگھ بھنڈراوالا کا آبائی گاؤں ہے۔ یہیں امرت پال نے خود کو بھنڈراوالا 2 قرار دیا تھا۔

18 مارچ کو پنجاب پولیس کو چکمہ دے کر فرار ہونے کے بعد امرت پال کی لوکیشن ہریانہ، اتراکھنڈ، دہلی سمیت کئی مقامات پر ملی۔ پولیس اب تک امرت پال کے 9 قریبی دوستوں کو این ایس اے کے تحت گرفتار کر کے آسام کی ڈبرو گڑھ جیل بھیج چکی ہے۔پولیس پچھلے کئی دنوں سے امرت پال کا پیچھا کر رہی تھی۔ پولیس کی حکمت عملی لیک ہونے کی وجہ سے پولیس تین بار امرت پال کو نہیں پکڑ سکی۔

اب اتوار کی صبح تقریباً 6.30 بجے پولیس نے امرت پال کو روڈے گاؤں سے پکڑ لیا۔ امرت پال کے خلاف پنجاب میں این ایس اے سمیت مختلف دفعات کے تحت کیس درج  ہیں۔ ترجمان پنجاب پولیس نے کہا ہے کہ قانون اپنا کام کر رہا ہے۔ کچھ وقت میں سب کچھ واضح ہو جائے گا۔

گرفتاری نہیں سرینڈر کیا: روڈے

امرت پال کے بارے میں بھنڈراوالا کے بھتیجے جسبیر سنگھ روڈے نے دعویٰ کیا ہے کہ امرت پال کو گرفتار نہیں کیا گیا، اس نے سرینڈر کیا ہے۔ وہ رات سے روڈے گاؤں کے گرودوارہ میں تھا۔ آج صبح پاٹھ کے بعد ارداس کی گئی اور امرت پال نے سنگت کو خطاب کیا۔ اس کے بعد امرت پال نے خود کو پولیس کے حوالے کر دیا۔جسبیر سنگھ روڈے نے دعویٰ کیا کہ پولیس کو رات ہی اس کی اطلاع دی گئی تھی۔

Recommended