راہل گاندھی نے مہنگائی کے خلاف آواز اٹھانے کی اپیل کی

 کانگریس نے شروع کی اسپیک اپ اگینسٹ پرائز رائز مہم 

نئی دہلی،05مارچ (انڈیا نیرٹیو)

کانگریس نے پٹرول ڈیزل اور رسوئی گیس کے ساتھ دیگر خوردنی اشیاءکی قیمتوں میں اضافہ کے خلاف سوشل میڈیا پر مہم کی شروعات کی ہے۔ اس کے تحت پارٹی کے سابق صدر راہل گاندھی نے لوگوں سے کانگریس کے اسپیک اپ اگینسٹ پرائز رائز مہم سے جڑکر مہنگائی کے خلاف آواز اٹھانے کی اپیل کی ہے۔

 راہل گاندھی نے ٹوئٹ کرتے ہوئے کہا کہ افراط زر ایک لعنت ہے۔ مرکزی حکومت عوام کو ٹیکس کمانے کے لیے مہنگائی کے دلدل میں دھکیلتی جا رہی ہے۔ راہل گاندھی نے مزید کہا کہ ملک کی تباہی کے خلاف آواز اٹھائیں۔ راہل گاندھی نے بھی اپنے ٹویٹ میں ایک ویڈیو بھی شیئر کیا ہے۔

 جس میں یہ کہا گیا ہے کہ جب سے بی جے پی حکومت اقتدار میں آئی ہے مہنگائی مسلسل لوگوں کی کمر توڑ رہی ہے۔ اشیائے خورد و نوش کی قیمتوں میں مسلسل اضافہ ہو رہا ہے۔ پٹرول – ڈیزل اور ایل پی جی کی قیمتوں میں مسلسل اضافہ ہو رہا ہے۔

 اس ویڈیو میں مزید کہا گیا ہے کہ مودی حکومت مہنگائی پر قابو پانے میں ناکام ہوچکی ہے۔ عوام مہنگائی سے دوچار ہے۔ اسی کے ساتھ کانگریس نے مرکزی حکومت سے تیل اور گھریلو گیس کی بڑھی قیمتوں کو واپس لینے اور عام شہریوں کو راحت فراہم کرنے کا مطالبہ کیا ہے اور لوگوں سے کانگریس کے ذریعہ چلائی جا رہی مہم#SpeakUpAgainstPriceRiseمیں شامل ہونے کی بھی اپیل کی ہے۔