گہلوت پر وسندھرا کے ساتھ  ساز باز کا الزام، پائلٹ کا اپنی ہی حکومت کے خلاف بھوک ہڑتال پر بیٹھنے کا فیصلہ

جے پور، 9 اپریل (انڈیا نیرٹیو)

راجستھان میں سابق نائب وزیر اعلی ٰسچن پائلٹ نے وزیر اعلی اشوک گہلوت پر وسندھرا راجے کے ساتھ ساز باز کا الزام لگاتے ہوئے اپنی ہی حکومت کے خلاف انشن پر بیٹھنے کا فیصلہ کیا ہے۔ انہوں نے بدعنوانی کے معاملے پر ایک بار پھر اپنی ہی پارٹی کی حکومت پر سوال اٹھائے ہیں۔

پائلٹ نے یہ فیصلہ اتوار کو اپنی رہائش گاہ پر بلائی گئی پریس کانفرنس میں کیا۔ انہوں نے کہا کہ میں نے ایک سال قبل سابق وزیر اعلی وسندھرا راجے کے خلاف وزیر اعلی گہلوت سے شکایت کی تھی، لیکن گہلوت نے کوئی کارروائی نہیں کی۔ اس کی مخالفت میں پائلٹ 11 اپریل کو جے پور میں شہداء  کی یادگار پر ایک روزہ بھوک ہڑتال پر جائیں گے۔

پائلٹ نے کہا کہ وسندھرا حکومت میں بدعنوانی پر کوئی کارروائی نہیں کی گئی۔ اپوزیشن میں رہتے ہوئے ہم نے وعدہ کیا تھا کہ انکوائری کرائی جائے گی۔ الیکشن میں 6 سے 7 ماہ باقی ہیں، مخالفین کنفیوژن پھیلا سکتے ہیں کہ کوئی  ساز باز نہیں، ثابت کرنے کے لیے جلد کارروائی کرنا ہوگی۔ تاکہ کانگریسی کارکنان کو لگے کہ ہمارے قول و فعل میں کوئی فرق نہیں ہے۔

وسندھرا حکومت کے دوران اپوزیشن میں رہتے ہوئے ہم نے 45,000 کروڑ روپے کے گھوٹالوں کے بارے میں آواز اٹھائی تھی اور وعدہ کیا تھا کہ حکومت ان گھوٹالوں کی منصفانہ طریقے سے تحقیقات کرے گی اور مجرموں کو سزا دے گی۔

میں نے کبھی بدنیتی پر مبنی کارروائی کا مطالبہ نہیں کیا لیکن اپوزیشن کے طور پر جو ساکھ ہم نے بنائی ہے اسے برقرار رکھنا ہوگا۔ میں نے سی ایم گہلوت سے درخواست کی تھی۔